Read Nguna Togoa Etafe North SALAMO 73 Bible Online

SALAMO 73 - Nguna Togoa Etafe North bible

SALAMO 73

¹Salamo sikai ki Asaf. Lomau Sup̃e e p̃ia paki Israel, Paki tea p̃op̃o tautau maga.

²Ma kinau, nam̃elegu ero m̃aladigi dapilagona; Navasiana aginau maga eu m̃aladigi pa‐parasai.

³Nalakena a doitoi tea leomadaga maga, Ragi waina a do punusi natam̃ateana ki tea sigisigileo maga.

⁴Nalakena namateana adeada e da pilake te natali seara mau: Ma nakasuaana adeada e m̃anopunopu.

⁵Eu da doko narogokitesaana dapala naatam̃oli p̃ota maga mau; Go eu da pei tea wokatiana dapala naatam̃oli p̃ota maga mau.

⁶Nalakena tea wanogoe naleomadagaana e daligoro ra dapala namori ni nanoada; Sugoro ni namaripavakotoana e do kovagoro ra.

⁷Namatada ero do pukavuka ki nam̃anopunopuana: Namidodoana maga ni nap̃op̃oda eu do lelep̃esi.

⁸Eu do pasasaudoa, po do pasa namaripavakotoana doko nasigisigileoana: Eu do pasa pae elagi.

⁹Eu lawo ki nawokada nakoroatelagi maga, Go namenada e do surata maramana.

¹⁰Nalakena tea wanogoe narei aneana eu do liliu umai: Go noai maga ni lasa‐munu vura eu do madeada pei tea m̃olidaunakiana.

¹¹Go eu naga, Sup̃e e atae dapale sava? Go naataeana e doko Tea Vakilagi mau kite?

¹²P̃a leo, nara eu pei tea sigisigileo maga; Go eu doko dam̃ate sara ragi, eu do disu nasogolapaana.

¹³Lomau, a mari nap̃op̃ogu e dautau p̃alo, Po pavano ki nam̃elearugu maga natautauana;

¹⁴Go a pei tea wokatiana naaleatia mamau, Go navarati‐au‐ana e doko sara malip̃ogi.

¹⁵A pe naga, Aga wo dogorogo dapala nogoe; P̃a leo, a pe mari malauweluki paki tagona ni natum̃a maga.

¹⁶Go ragi waina a midodoa naga aga atae tea wanogoe, E pei nawosiana kasua namatagu maga;

¹⁷Pa pa a paloti paki tokora tapu maga ki Sup̃e, Po midoakiatae tea edaku adeada.

¹⁸Lomau ku do lawo ki da tokora m̃arasarasa maga: Ku mari ra eu dowo paki namavunuvunuana.

¹⁹Eu po pei maso maladi m̃araverave pa dapala ragi ni nawilimataana sikai! Eu puoli eu nopu ki tea mataukiana maga.

²⁰Dapala nap̃erea sikai ragi ni natarapaana; Nawota O, ragi waina p̃a wo darapa p̃a wo midoakip̃alo ki nunuda.

²¹Nalakena nap̃op̃ogu e lotalota, Go nap̃elekevatugu ero pei tea vuriana:

²²Go kinau a pei lala, go a pei sap̃o; A pei nalo tuavati warua sikai sikoti ko.

²³Ma kinau a sikoti ko sara ragi: Ku puasoki au ki nam̃elearugu ni matua.

²⁴P̃a wo maraki au ki navasaparatikiana anigo, Go p̃a wo edaku piragi au paki nasamasamaana.

²⁵Sei e pei aginau nakoroatelagi? Go a da masau tea p̃ota sikai maramana sikoti ko mau.

²⁶Nap̃okasigu go nap̃op̃ogu ero sirinopu: Ma Sup̃e e pei vatu‐laketoko ni nap̃op̃ogu, go tea veanip̃otaeana aginau pa pa e du mau du.

²⁷Nalakena, p̃a leo, tea maga waina eu madu uvea ki‐go euga wo puoli: Ku daelua tea maga mamau puti waina eu maripele pa dua ki‐go pano.

²⁸Ma kinau navaki‐m̃aladigi‐ki‐Sup̃eana e p̃ia ki‐nau: A mari Nawota Sup̃e e pei tokora ni nasavasiliana aginau, Naga aga rogorogo ki nawosiana anigo maga mamau puti.