Read Nguna Togoa Etafe North SALAMO 74 Bible Online

SALAMO 74 - Nguna Togoa Etafe North bible

SALAMO 74

¹Maskil ki Asaf. Sup̃e O, ekasana ku dip̃adoa gami pa pa e du mau du? Ekasana namaetoana anigo e do asua dip̃a shiip ni napega anigo?

²P̃a midoa ki nasaisaiana anigo waina ku pakotovi ra tuai, Waina ku daulua ra naga euga vei naworawora ni tea veaniana anigo; Go tava Sion, waina ku doko asa.

³P̃a sike nam̃elem̃a maga paki tea makaka maga waina eu du mau du, Tea marisakiana maga mamau puti waina tea kokona e mari ra tokora tapu.

⁴Tea maga waina eu mari kokona paki‐go eu uru m̃aleoputo ni nasaisaiana anigo; Eu lawo ki manututu adeada maga eu pei navaivaiana maga.

⁵Eu dapala tea maga waina eu sike tagoto maga pakilagi Paki nakau wono maga ni mala ni nakau.

⁶Go ragi waia midiria kakana maga Eu p̃okap̃orae saisai ki puti a ki tagoto go ki hammer maga.

⁷Eu dokoni ki nakapu tokora tapu anigo; Eu dakai paki natano nasum̃atokoana ni nagisam̃a.

⁸Eu noa nap̃op̃oda, Tuga marisasa ki saisai ki puti a: Eu dap̃ara ki nasum̃a ni nasaisaiana maga mamau puti ki Sup̃e navanua.

⁹Au da punusi navaivaiana aginami maga mau: Te profeta sikai e da moro doko mau; Go tea waina e atae pa pa paki seve ragi e da sikoti gami mau.

¹⁰Sup̃e O, tea riesoki ega wo pasapinoa pa pa paki seve ragi? Tea kokona ega wo pasadao nagisam̃a pa pa ega tu mau du kite?

¹¹Ekasana ku dosa liliua ki nam̃elearum̃a, go nam̃elearum̃a ni matua? P̃a sai ki nia ega m̃elu dua ki m̃aleoputo ni narum̃am̃a go p̃a mari ra euga nopu.

¹²Ma Sup̃e e pei Nawota aginau pae tuai, E do mari namautipauriana maga m̃aleoputo ni maramana.

¹³Nigo ku dap̃otae natasi ki nakasuaana anigo: Ku marip̃orae nap̃au maga ni drakon maga elagi ni noai maga.

¹⁴Nigo ku marip̃oraworae nap̃au maga ni leviathan, Ku pitua ki nia naga ega vei navinaga agi naatam̃oli maga waina eu doko masop̃alo.

¹⁵Nigo ku dasasai namata ni noai go nap̃ap̃a ni noai sara: Nigo ku mari noai sara maga waina eu do sara mau e dap̃a.

¹⁶Aleati e pei anigo, p̃ogi ma e pei anigo: Nigo ku dawona ki namarama go elo.

¹⁷Nigo ku lawo ki kokoi maga mamau puti ni maramana: Ragi ni navivitinuana go ragi ni namaladiana nigo ku mari ra.

¹⁸P̃a midoa ki tea waia, naga tea kokona e pasapinoa, Yehovah O, Go naga narei sikai waina eu pei lala sigisigileo eu pasadao nagisam̃a.

¹⁹P̃a ta pitua ki naata ni turi anigo paki nalo mila mau: P̃a ta malio ki namauriana ni tea rogokitesa anigo maga pa pa ega tu mau du mau.

²⁰P̃a leopunusi navasasokiana: Nalakena tokora maligo maga ni maramana eu pura ki natokoana maga ni namaripavakotoana.

²¹Tea marip̃oriworiana ega ta pei tea dododaona liliu umai mau: Tea rogokitesa go tea tika eroga samasamani nagisam̃a.

²²P̃a tuleana, Sup̃e O, p̃a vululu navululuana anigo: P̃a midoa ki navasapinoaki‐go‐ana pae tea vei lala sigisigileo naaleatia mamau.

²³P̃a ta malio ki nadaleo ni tea maga waina eu marikokona paki‐go mau. Nap̃agaagaana ni tea maga waina eu duleana dip̃a ko e do sake sara ragi.