Read Nguna Togoa Etafe North SALAMO 75 Bible Online

SALAMO 75 - Nguna Togoa Etafe North bible

SALAMO 75

¹Salamo sikai ki Asaf, nalegaana sikai. Au pasadodom̃ata ki‐go, Sup̃e O; Au pasadodom̃ataki, go nagisam̃a e pei m̃aladigi: Eu do dogorogo ki nawosiana ni namagaana anigo maga.

²Ragi waina aga wo dape ragi tatutakiana, Kinau aga wo pasap̃otae leana.

³Maramana go tea mamau puti waina eu doko asa eu sara: Kinau a lawo ki tip̃a kakana maga. Selah.

⁴A noa ki tea leomadaga maga, Kuga ta marimadaga mau: Go ki tea sigisigileo, Kuga ta sike napati ni nap̃aumu mau:

⁵Kuga ta sike napati ni nap̃aumu pakilagi mau; Kuga ta pasa ki nanoa leomadaga mau.

⁶Nalakena nasikeana pakilagi e da pae ist, go e da pae west, Go e da pae sauth umai mau.

⁷Nalakena Sup̃e e pei tea vasap̃otae: E do mari sikai e pakitano, go do mari tea p̃ota sikai e pakilagi.

⁸Nalakena lasa munu sikai e doko nam̃elearu ni Yehovah, go waine kakana e do lotalota; E pura ki tea lip̃akisariana, go e do da ki lua e: Lomau tea nadisoki kakana maga, tea sigisigileo maga mamau puti ni maramana euga wo dum̃ililua ra, po munugi ra.

⁹Ma kinau aga wo dogorogo pa pa ega tu mau du, Aga wo lega‐samasamani Sup̃e ki Yakob.

¹⁰Go aga wo daekotovi napati maga mamau puti ni nap̃au ni tea sigisigileo maga; Ma napati maga ni nap̃au ni tea leana euga wo pei tea sikeana pakilagi.