Read Nguna Togoa Etafe North SALAMO 78 Bible Online

SALAMO 78 - Nguna Togoa Etafe North bible

SALAMO 78

¹Maskil ki Asaf. Narei aginau O, kuga takidorogo nawotaeana aginau: Kuga ta ki nadaligamu maga paki nanoaana maga ni nawokagu.

²Aga wo p̃olagati nawokagu naluluakiana sikai; Aga wo lua ki navasamaluluakiana maga ni tuai:

³Waina tu dogo ra po atae ra, Go waina tamagida maga eu dogorogo ki da paki gida.

⁴Tuga wo da dasuru ki natuda maga ara mau, Tuga wo do dogorogo paki tagona edaku ki nasamasamani Yehovah‐ana maga, Go ki nakasuaana aneana, go ki nawosiana ni namagaana aneana maga waina e mari ra.

⁵Go e sike nanoasokisokiana sikai e doko Yakob, Go e lawo ki nawotaeana sikai e doko Israel, Waina e dip̃a ki tamagida maga ara, Naga euga mari ra eroga vei tea ataeana paki natuda maga:

⁶Naga tagona edaku euga atae ra, natuda maga waina euga wo pakilina; Waina euga wo duleana po dogorogo ki da paki natuda maga:

⁷Naga euga lawo ki naleogoroana adeada ega toko Sup̃e, Go naga euga ta malio ki nawosiana maga ki Sup̃e mau, Ma naga euga rogo parati ki natip̃akiana aneana maga:

⁸Go naga euga ta dakiusi tamada maga mau, Tagona kasua go p̃auluulu; Tagona waina eu da mari m̃ata ki nap̃op̃oda mau, Go waina naatada e da pei lomau paki Sup̃e mau.

⁹Efraim natuna maga, waina eu pua nalikau maga po pei tea tipe ki naasu, Eu liliu pano naaleatia ni navakalo.

¹⁰Eu da pavaigoro navasasokiana ki Sup̃e mau, Go eu karai naga euga surata pae nawotaeana aneana;

¹¹Go eu malio ki namariana aneana maga, Go nawosiana ni namagaana aneana maga waina e pisei ki da ara.

¹²E mari tea ni namagaana maga narae ni tamada maga, Navanua ni Ityipt, vanua ni Soan.

¹³E dap̃otae natasi, po mari ra eu duagoto pano; Go e mari noai maga eu lawodu dakiusi taua sikai.

¹⁴Go e maraki ra ki napopouru sikai aleati, Go ki namarama ni nakapu nap̃ogiana mamau.

¹⁵E dasasai vatu laketoko maga masop̃alo, Po dua p̃arua ki da noai munu e dapala epua maga.

¹⁶Go e piragi noai sara maga eu m̃elu vatu laketoko, Po mari noai maga eu sara siwo dapala noai sara maga.

¹⁷Ma eu moro sokari namarinaleosaana dip̃a e, Go naveip̃auluuluana dip̃a Tea Vakilagi mau maso garagara.

¹⁸Go eu maridogo Sup̃e nap̃op̃oda Dapala eu datago navinaga agi naatada.

¹⁹Go eu pasadip̃a Sup̃e; Eu naga, Sup̃e e mariatae ovara ki wede sikai masop̃alo kite?

²⁰Kuga leo, e p̃okati vatu‐laketoko go noai maga eu sara dave, Go noai sara maga eu sara peravera; E moro mariatae pitua ki navinaga kite? Ega wo magi narei aneana dape nap̃okasi umai kite?

²¹Nalakena tea wanogoe Yehovah e dogo, po maritausu: Go nakapu sikai e pavaga dip̃a Yakob, Go namaetoana ma e sake dip̃a Israel;

²²Nalakena eu da saralomau Sup̃e mau, Go eu da pavatu namautipauriana aneana mau.

²³Ma e dip̃a ki napopouru maga ni elagi, Po p̃olagati namata maga ni nakoroatelagi;

²⁴Go e mari manna e p̃owo ara naga euga kani a, Go e dua ra korn ni nakoroatelagi.

²⁵Naatam̃oli eu gani bred ki tea kasua maga: E madeada dip̃akilua navinaga pa pa eu puka.

²⁶E mari nalagi ni ist e sau nakoroatelagi: Go e digo ki nakasuaana aneana nalagi ni sauth.

²⁷Go e mari nap̃okasi e p̃owo ara e dapala nam̃otam̃ota, Go manu ni nalivaru eu dapala naworaone ni natasi maga:

²⁸Go e mari a e dowo m̃aleoputo ni tokora ni nam̃enakiana adeada, Dalivirigoro natokoana adeada maga.

²⁹Go eu ganikani po puka p̃arua; Go e madeada piragi umai tea waina eu masauna.

³⁰Eu da dawasi m̃elu dua ki namasauana adeada mau, Navinaga adeada e ko doko nawokada,

³¹Go namaetoana ki Sup̃e e sake dip̃a ra, Po maripunue m̃aleoputo ni tea m̃anopunopu kakada maga, Po mari natureai maga ni Israel eu ditip̃atua pakitano.

³²Tea maga wanogoe, ma eu moro mari naleo sa, Po da saralomau nalakena nawosiana ni namagaana aneana maga mau.

³³Go e mari naaleatia adeada maga eu sirinopu ki tea p̃alo, Go natau adeada maga ki nam̃anauanauana.

³⁴Ragi waina e mari punue ra, ragi wanogoe eu pusuusu ki nia: Po liliu umai po laaga Sup̃e m̃araverave.

³⁵Go eu midoa ki nia naga Sup̃e e pei vatu‐laketoko adeada, Go naga Sup̃e Vakilagi mau e pei tea taulua ra.

³⁶Ma eu surue a ki nawokada; Po soro e ki namenada.

³⁷Go nap̃op̃oda e da pei tea lawokilaketokoana sikoti a mau, Go eu da pei lomau doko navasasokiana aneana mau.

³⁸Ma nae e pei maritadodomi, po dap̃augoro namarinaleotageleana adeada, po da mari sa ki da mau: Go e paka laapa mari namaetoana aneana e liliu pano, Go e da pulevule namaritausuana aneana mamau mau.

³⁹Go e midoa ki nia naga nara eu pei nap̃okasi; Nalagi sikai waina e pano, go ega wo da moro liliu umai mau.

⁴⁰Eu paka visa marip̃auluulu paki nia masop̃alo, Po mari a e susue maso maladi!

⁴¹Go eu liliu pano po maridogo Sup̃e, Po kokoigoro Tea Tapu ki Israel.

⁴²Eu da midoa ki nam̃elearuna mau, Naaleatia waina e daulua ra asa m̃elu dua ki nariesokiana.

⁴³Waina e lawo ki navaivaiana aneana maga Ityipt, Go tea ni namagaana aneana maga vanua ni Soan;

⁴⁴Po doa noai sara adeada maga eu pei nada, Go noai sara kiki adeada maga, naga euga ta munu mau.

⁴⁵E dip̃akilua lago maga paki m̃aleoputo kakada, waina eu gani ra; Go frok maga, waina eu mari sa ki da.

⁴⁶Go e pitua ki navinaga adeada paki uraasi, Go nawosiana adeada paki midiri.

⁴⁷E maripunue vaine adeada maga ki usa ni vatu, Go naita adeada maga ki usa ni vatu warua.

⁴⁸Go e pitua ki katel adeada maga paki usa ni vatu, Go navata adeada maga paki navila maga.

⁴⁹E dip̃akilua navivitinuana ni namaetoana aneana paki da, Namaritausuana, go navaratiana, go nariesokiana, Taua tautauana sikai ni agelo maga ni tea sa.

⁵⁰E magi namaetoana aneana marim̃ata ki napua sikai; E da mauti naatada ki namateana mau, Ma e pitua ki namauriana adeada paki nasasanaana ni namateana.

⁵¹Go e atugi tea takalapa maga mamau puti ni Ityipt, Takavea maga ni nakasuaana ni tap̃aup̃au maga ki Ham:

⁵²Go e piragilua narei aneana eu dapala shiip, Po digo ra masop̃alo eu dapala navata sikai.

⁵³Go e maraki m̃ata ki‐da, go eu da mataku mau: Ma natasi e dap̃augoro tea kokona ki da maga.

⁵⁴Go e piragi ra umai paki kokoi ni tokora tapu aneana, Paki tava waia waina nam̃elearuna ni matua e dalua e.

⁵⁵Go e kopasilua nalauna maga pa dua ki naraeda, Po dap̃otawotae ra ki laine totowo naga euga vei tea veanipiolikiana sikai, Po mari naworawora ni Israel maga eu doko tap̃aup̃au adeada maga.

⁵⁶Ma eu maridogo po marip̃auluulu paki Sup̃e Vakilagi mau, Po da pavaigoro nanoasokisokiana aneana maga mau;

⁵⁷Go eu liliu pano, po mari malauweluki dakiusi tamada maga: Eu maradoa dakiusi naasu ni namarisoreana.

⁵⁸Go eu mari a e maeto ki tokora vakilagi adeada maga, Po mari a e dotowo kasua ki nasup̃e taeana adeada maga.

⁵⁹Sup̃e e dogo po maritausu, Po dip̃adoa p̃arua ki Israel:

⁶⁰Go e doropusi nasum̃atokoana ni Shiloh, Tap̃aup̃au waina e mari a e doko m̃aleoputo ni naatam̃oli maga;

⁶¹Go e pitua ki nakasuaana aneana paki naviragiluapavakotoana, Go nasamasamaana aneana paki nam̃elearu ni tea kokona.

⁶²Go e pitua ki narei aneana paki lova; Po maritausu ki tea veaniana aneana.

⁶³Nakapu e gani natureai adeada maga; Go nagoroi atara adeada maga eu da pei tea lega‐samasamaniana mau.

⁶⁴Tea viri adeada maga eu dowo ki lova; Go nagoroi malepu adeada maga eu da dagi mau.

⁶⁵Ragi wanogoe Nawota e darapa dapala tea maturu sikai, Dapala tea marimatua sikai waina e po munu p̃arua ki waine.

⁶⁶Go e atugi tea kokona ki nia maga eu liliu pano: E dua ra navasapinoaki‐da‐ana waina e du mau du.

⁶⁷Go e dip̃adoa tap̃aup̃au ki Yosef, Go e da matadoa naworawora ni Efraim mau;

⁶⁸Ma e matadoa naworawora ni Yudah, Tava Sion waina e dodomi a.

⁶⁹Go e davagi tokora tapu aneana e dapala tokora vakilagi maga, E dapala maramana waina e lawo ki nia pa pa e du mau du.

⁷⁰Go e matadoa David tea suasua aneana, Po puati a m̃elu dua ki loga maga ni shiip.

⁷¹E piragi a umai m̃elu dua ki nataku ni shiip goroi maga waina eu do pakasusu, Naga ega leoparatikipakale Yakob narei aneana, go Israel tea veaniana aneana.

⁷²Go e leoparatikipakale ra pae nawialuaana ni nap̃op̃ona; Go ega wo maraki ra ki namidoakiataeana ni nam̃elearuna maga.