Read Nguna Togoa Etafe North SALAMO 79 Bible Online

SALAMO 79 - Nguna Togoa Etafe North bible

SALAMO 79

¹Salamo sikai ki Asaf. Sup̃e O, nalauna maga eu po umai paki tea veaniana anigo; Eu mari nasum̃a tapu anigo e loa; Eu mari Yerusalem e pei taua maga.

²Eu pitua ki nap̃atoko mate ni tea suasua anigo maga naga euga vei navinaga ki manu maga ni nakoroatelagi, Nap̃okasi ni tea dodomi‐dodomiana anigo maga paki nalo mila maga ni maramana.

³Eu da ki nadada dapala noai dalivirigoro Yerusalem; Go tea ova ki da e dika.

⁴Au po pei tea vasapinoakiana ki tea maga waina eu doko m̃aladigi ki gami, Tea vasasaudoakiana go tea vasadaoana ki tea maga waina eu doko dalivirigoro gami.

⁵Yehovah O, p̃a wo maeto pa pa paki seve ragi? Pa pa ega tu mau du kite? Natotowokasuaana anigo ega wo pavaga dapala nakapu kite?

⁶P̃a ta ki namaetoana anigo paki nalauna maga waina eu da atae ko mau, Go paki namarakiana maga waina eu da pioso ki nagisam̃a mau.

⁷Nalakena eu gani Yakob, Po mari natokoana aneana e pei maso maladi.

⁸P̃a ta midoa ki dip̃a gami namarinaleotageleana maga ki tea matua vea aginami maga mau: Namaritadodomiana anigo maga euga veagoro gami m̃araverave: Nalakena au pei tea viragiana pakitano p̃arua.

⁹P̃a silae gami, Sup̃e ni namautipauri‐gami‐ana O, nalakena nasamasamaana ni nagisam̃a: Go p̃a vualua gami, go p̃a tap̃augoro namarinaleosaana aginami maga, nalakena nagisam̃a.

¹⁰Ekasana nalauna maga euga naga, Sup̃e adeada wai? Nasikosikoana ni nada ni tea suasua anigo maga waina e pei tea takiana Ega vei tea ataeana m̃aleoputo ni nalauna maga namatagami maga.

¹¹Nagiana ki tea soliana ega valoti paki naraem̃a; Pae nawaruaana ni narum̃a p̃a mauti ra euga mauri doko tea maga waina eu pei tea tip̃akotoviana naga euga mate;

¹²Go p̃a mari a ega liliu paki tea maga waina eu doko m̃aladigi ki gami tea vaka larua ega vaki narum̃ada. Navasapinoaana adeada, waina eu pasapinoa ki‐go asa, Nawota O.

¹³Go kinami narei anigo go shiip ni napega anigo Auga wo pasadodom̃ata ki‐go pa pa ega tu mau du: Auga wo dogorogo ki nasamasamani‐ko‐ana pa pa paki tagona go tagona.