Read Nguna Togoa Etafe North SALAMO 80 Bible Online

SALAMO 80 - Nguna Togoa Etafe North bible

SALAMO 80

¹Salamo sikai ki Asaf. Tea Leoparatikipakale Israel O, p̃a takidorogo, Waina ku do maraki Yosef dapala navata sikai; Waina ku do doko kerub maga, p̃a maramalaga dave.

²Narae ni Efraim go Benyamin go Manasseh, p̃a vulevule namarimatuaana anigo, Go p̃a umai naga p̃a mautipauri gami.

³Sup̃e O, p̃a viragi gami auga liliu; Go p̃a mari naraem̃a ega maramalaga, go auga wo pei tea mautipauriana.

⁴Yehovah, Sup̃e ki taua maga O, P̃a wo maeto dip̃a natapasavasaana ki narei anigo pa pa paki seve ragi?

⁵Ku mari ra eu gani navinaga ni naririmata, Go ku mari ra eu munu totowo warua ni naririmata maga.

⁶Ku mari gami au pei tea vululukiana ki tea maga waina eu doko m̃aladigi ki gami: Go tea kokona ki gami maga eu marisaudoa ki gami dum̃ada paki da.

⁷Sup̃e ki taua maga O, p̃a viragi gami auga liliu; Go p̃a mari naraem̃a ega maramalaga, go auga wo pei tea mautipauriana.

⁸Ku pakulua vaine sikai m̃elu dua ki Ityipt: Ku kopasilua nalauna maga, po lawo e.

⁹Ku maripakasa ki pea ki nia, Go e sai ki nakoana maga pakipua, po pakavuro navanua.

¹⁰Tava maga eu pei tea tap̃augoroana ki meluna, Go arana warua maga eu dapala sidar maga ki Sup̃e.

¹¹E sai ki arana maga paki natasi, Go nasulina maga paki Noaisara.

¹²Ekasana ku marip̃orae nakoro kakana maga, Go tea maga mamau puti waina eu liu sa pae napua pano eu p̃asilua e?

¹³Wago waina e m̃elu mala ni nakau e do mari sa ki nia, Go nalo mila maga ni namalasi eu do gani a.

¹⁴Sup̃e ki taua maga O, p̃a liliu umai, au pavarani ko asa: P̃a leo pae nakoroatelagi, po punusi, go p̃a umai punusi vaine waia,

¹⁵Go lake waina nam̃elearum̃a ni matua e lawo e, Go arana waina ku dum̃am̃a manigo mari a e kasua.

¹⁶E pei tea tap̃arakiana ki nakapu, e pei tea taeluaana: Eu do puoli nalakena navasakasuaana ni naraem̃a.

¹⁷Nam̃elearum̃a ega toko naatam̃oli ni nam̃elearum̃a ni matua, Ega toko naatam̃oli natuna waina ku dum̃am̃a manigo mari a e kasua.

¹⁸Go auga wo da liliu m̃elu dua ki‐go pano mau: P̃a wo pakamauri ki gami, go auga wo pioso ki nagisam̃a.

¹⁹Yehovah O, Sup̃e ki taua maga, p̃a viragi gami auga liliu; P̃a mari naraem̃a ega maramalaga, go auga wo pei tea mautipauriana.