Read Nguna Togoa Etafe North SALAMO 83 Bible Online

SALAMO 83 - Nguna Togoa Etafe North bible

SALAMO 83

¹Nalegaana sikai, Salamo sikai ki Asaf. Sup̃e O, p̃a ta datam̃ate mau: P̃a ta punuta mau, go p̃a ta dam̃ate doko mau, Sup̃e O.

²Nalakena, p̃a leo, tea kokona ki‐go maga eu do diri: Go tea maga waina eu pilosi ko eu sike nap̃auda.

³Eu do mari nasekeana ni namarimanumatuaana dip̃a narei anigo, Go eu do pusum̃aki dip̃a tea tasurukiana anigo maga.

⁴Eu naga, Kuga umai, go tuga taelua ra, naga euga ta pei nalauna sikai mau: Go nagisa ni Israel ega ta moro pei tea midoakiana mau.

⁵Nalakena eu pei taua pusum̃aki ki nap̃op̃oda; Eu do mari navasasokiana sikai dip̃a ko:

⁶Tap̃aup̃au maga ki Edom go naworawora ni Ishmael; Moab, go naworawora ni Hakar;

⁷Kebal, go Ammon, go Amalek; Filistia sikoti naka ni Tair:

⁸Ashur ma e puluti ra; Eu magi Lot natuna maga pei naru sikai. Selah.

⁹P̃a mari paki da ega tapala waina ku mari paki Midian; Go paki Sisera, go paki Yabin, noai sara Kishon:

¹⁰Waina eu pei tea marisakiana Endor; Eu magi natano pei natae.

¹¹P̃a mari navarapule adeada maga euga tapala Oreb go Seeb; Go tea maraki adeada maga mamau puti euga tapala Sebah go Salmunna:

¹²Waina eu naga, Tuga tape tuga veani Natokoana maga ki Sup̃e.

¹³Sup̃e aginau O, p̃a mari ra euga tapala nasogosogo ni suitaviro; Euga tapala nam̃otam̃ota narae ni nalagi.

¹⁴Dapala nakapu waina e do gani mala ni nakau, Go dapala soro ni nakapu waina e do dokoni tava maga;

¹⁵Dapala nogoe p̃a wo kopasi ra ki nalagi atu anigo, Po mari ra euga m̃anaunau ki nalagi miala anigo.

¹⁶P̃a vakavuro naraeda ki namaliereana; Go naatam̃oli maga euga wo laaga nagisam̃a, Yehovah O.

¹⁷Euga wo maliere po m̃anaunau pa pa ega tu mau du; Go euga wo matamaliere po puoli:

¹⁸Go naatam̃oli maga euga wo atae naga nigo, waina nagisam̃a e pei YEHOVAH, Ku masikim̃a pei Tea Vakilagi mau usuraki maramana mamau.