Read Nguna Togoa Etafe North SALAMO 84 Bible Online

SALAMO 84 - Nguna Togoa Etafe North bible

SALAMO 84

¹Nalegaana sikai ki Korah natuna maga. Nasum̃atokoana anigo maga eu pei tea dodomiana pa, Yehovah ki taua maga O!

²Naatagu e masau p̃arua, go e sirinopu raki roara maga ni nasum̃a ki Yehovah; Nap̃op̃ogu go nap̃okasigu ero do kuapioso paki Sup̃e mauri.

³Sparro ma e pap̃ai nasum̃a sikai, Go manu kapataika e dum̃ana maneana pap̃ai vete sikai, waina ega toropusi natuna maga asa, Wede ni naviriana anigo maga, Yehovah ki taua maga O, Nawota aginau, go Sup̃e aginau.

⁴Ae namaropaana ki tea maga waina eu do doko nasum̃a anigo! Euga wo do samasamani ko. Selah.

⁵Ae namaropaana ki naatam̃oli waina nakasuaana aneana e doko ako! Waina napua toniana maga eu doko nap̃op̃oda!

⁶Eu do surata duaduru nap̃aloa ni Nakaiana eu do mari a e pei tokora ni namata ni noai maga; Go usa vea e do dap̃augoro e ki navasam̃atakiana maga.

⁷Eu do surata pae nakasuaana paki nakasuaana, Ega wo pakilina narae ni Sup̃e Sion.

⁸Yehovah Sup̃e ki taua maga O, p̃a rogo natapasavasaana aginau: P̃a takidorogo, Sup̃e ki Yakob O. Selah.

⁹P̃a vunusi, Sup̃e O, nakokoro aginami, Go p̃a leopunusi narae ni tea vuvuraikiana anigo.

¹⁰Nalakena naaleatia sikai roara anigo maga e p̃ia liu manu sikai. A matadoa naga aga lawodu tea tuasila ni namata ni nasum̃a ki Sup̃e aginau, Naga aga ta doko tap̃aup̃au maga ni nasigisigileoana mau.

¹¹Nalakena Yehovah Sup̃e e pei elo sikai go nakokoro sikai: Yehovah ega wo pitua ki nasaup̃iaana go nasamasamaana: Ega wo da mauti te navatuna wia mau ki tea maga waina eu do surata pae nawialuaana.

¹²Yehovah ki taua maga O, Ae namaropaana ki naatam̃oli waina e do pavatu ako!