Read Nguna Togoa Etafe North SALAMO 85 Bible Online

SALAMO 85 - Nguna Togoa Etafe North bible

SALAMO 85

¹Salamo sikai ki Korah natuna maga. Yehovah, ku saup̃ia ki navanua anigo: Ku piragi liliua ki tea viragiluapavakotana maga ni Yakob.

²Ku dapelua namarinaleotageleana ki narei anigo, Ku dap̃augoro puti namarinaleosaana adeada. Selah.

³Ku dapelua puti namaritausuana anigo: Ku dum̃am̃a doa ki m̃elu dua ki navivitinuana ni namaetoana anigo.

⁴P̃a viragi gami auga liliu, Sup̃e ni namautipauri‐gami‐ana O, Go p̃a mari namaetoana anigo paki gami ega makoto.

⁵P̃a wo maeto ki gami pa pa ega tu mau du kite? P̃a wo dosagi namaetoana anigo pa pa paki tagona go tagona kite?

⁶Nigo p̃a wo da moro pakamauri ki gami: Naga narei anigo euga laelaea ako kite?

⁷P̃a visei ki gami nadodomiana anigo, Yehovah O, Go p̃a tua gami namautipauriana anigo.

⁸Aga wo dogo tea waina Sup̃e Yehovah ega wo pasa asa: Nalakena ega wo pasa natam̃ateana paki narei aneana, go paki tea dodomi‐dodomiana aneana maga: Ma euga ta moro liliu paki naveilalaana mau.

⁹Lomau namautipauriana aneana e pei m̃aladigi ki tea maga waina eu matau ki nia; Naga nasamasamaana ega toko navanua anigida.

¹⁰Nadodomiana go nalomauana ero dum̃ada sua ra; Namarinaleoleanaana go natam̃ateana ero dum̃ada dum̃ili ra.

¹¹Nalomauana e pisou pae maramana; Go namarinaleoleanaana e leo siwo pae nakoroatelagi.

¹²Go Yehovah ega wo pitua ki tea waina e p̃ia; Go navanua anigida ega wo pitua ki navinagana.

¹³Namarinaleoleanaana ega wo surata pea ki nia; Po mari navasiana aneana maga euga vei napua.