Read Nguna Togoa Etafe North SALAMO 86 Bible Online

SALAMO 86 - Nguna Togoa Etafe North bible

SALAMO 86

¹Natapasavasaana sikai ki David. P̃a ta ki nadaligam̃a, Yehovah O, go p̃a vasadara au; Nalakena kinau a dogo kite sa go a pei tea tika.

²P̃a vavaigoro naatagu; nalakena kinau a pei tea dodomi‐dodomiana sikai: Nigo, Sup̃e aginau O, p̃a mautipauri tea suasua anigo waina e do pavatu ako.

³P̃a saup̃ia ki nau, Nawota O; Nalakena a do pioso paki‐go naaleatia mamau.

⁴P̃a mari naata ni tea suasua anigo ega laelaea; Nalakena a do sike naatagu paki‐go, Nawota O.

⁵Nalakena nigo, Nawota, ku p̃ia, go ku do midoakikorokoro, Go ku p̃arua nadodomiana paki tea maga mamau puti waina eu do pioso paki‐go.

⁶P̃a vitua ki nadaligam̃a, Yehovah O, paki natapasavasaana aginau; Go p̃a takidorogo nadaleo ni navavaraniana aginau maga.

⁷Naaleatia ni nariesoki‐au‐ana aga wo pioso paki‐go asa; Nalakena p̃a wo pasadara au.

⁸Tea takiusi ko m̃aleoputo ni sup̃e maga, Nawota O, e da doko mau; Go te nawosiana seara waina eu dakiusi nawosiana anigo maga eu da doko mau.

⁹Nalauna maga mamau puti waina ku mari ra euga wo umai po suai natano naraem̃a, Nawota O, Go euga wo samasamani nagisam̃a.

¹⁰Nalakena nigo ku p̃arua po do mari tea ni namagaana maga: Nigo ku masikim̃a pei Sup̃e.

¹¹P̃a rigipisei ki nau napua anigo, Yehovah O; aga wo surata nalomauana anigo: P̃a vilasai ki nap̃op̃ogu naga aga matau ki nagisam̃a.

¹²Aga wo pasadodom̃ata ki‐go, Nawota Sup̃e aginau O, ki nap̃op̃ogu mamau; Go aga wo dodomadagani nagisam̃a pa pa ega tu mau du.

¹³Nalakena nadodomiana anigo paki nau e p̃arua; Go ku pualua naatagu pa dua ki p̃okasi ni etano mau.

¹⁴Sup̃e O, tea leomadaga maga eu duleana dip̃a au, Go nasaisaiana sikai ni tea vakamatakua maga eu laaga naatagu, Go eu da lawo ki‐go naraeda mau.

¹⁵Ma nigo, Nawota O, ku pei Sup̃e maritadodomi go saup̃ia, Tea maridaliali namaetoana, go tea warua nadodomiana go nalomauana.

¹⁶P̃a tum̃am̃a doa ko paki‐nau go p̃a saup̃ia ki nau; P̃a vitua ki nakasuaana anigo paki tea suasua anigo, Go p̃a mautipauri natu ni tea suasua nagoroi anigo.

¹⁷P̃a maginau mari navaivaiana sikai ni nawiaana; Go tea maga waina eu pilosi au euga wo punusi a, po maliere, Nalakena nigo, Yehovah, ku silae au po pasapakavakale au.