Read Nguna Togoa Etafe North SALAMO 88 Bible Online

SALAMO 88 - Nguna Togoa Etafe North bible

SALAMO 88

¹Maskil ki Heman nawora ni Serah. Yehovah O, Sup̃e ni namautipauri‐au‐ana, A pioso kivea ki‐go aleati go p̃ogi:

²Natapasavasaana aginau ega valoti paki naraem̃a; P̃a ta ki nadaligam̃a paki nakuapiosoana aginau:

³Nalakena naatagu e pura ki tea sa maga, Go namauriana aginau e paki m̃aladigi ki Sheol.

⁴A pei tea midoakiana naga a sikoti tea maga waina eu do siwo paki m̃oru; A dakiusi naatam̃oli sikai waina e dika nakasuaana:

⁵A one m̃aleoputo ni tea mate maga, Dakiusi tea maripunueana maga waina eu one matigo, Waina ku da moro midoa ki da mau; Go nara eu pei tea taeluaana pa dua ki nam̃elearum̃a.

⁶Ku doropusi au m̃orutano sikai waina e pakipua, Tokora maligoligo maga, epua maga.

⁷Namaetoana anigo e one soki au, Go ku mari au a dogokitesa ki natavara anigo maga mamau puti. Selah.

⁸Ku mari tea atae au maga eu madu uvea ki nau; Ku mari au a pei tea mamaragokiana adeada: A pei tea kokoroana, go a mari sap̃o dave.

⁹Namatagu e do m̃odave nalakena narogokitesaana: A pioso paki‐go sara naaleatia, Yehovah O, A darasike nam̃elearugu maga paki‐go.

¹⁰P̃a wo mari tea ni namagaana paki tea mate maga kite? Naatemate maga euga wo duleana po pasadodom̃ata ki‐go kite? Selah.

¹¹Nadodomiana anigo ega wo pei tea rogorogokiana matigo kite? Naveilomauana anigo tokora ni namarisakiana kite?

¹²Tea ni namagaana anigo ega wo pei tea ataeana namaligo kite? Go namarinaleoleanaana anigo navanua ni namaliokiana kite?

¹³Ma kinau a kuapioso paki‐go, Yehovah O, Go malip̃ogi natapasavasaana aginau ega wo paloti paki naraem̃a.

¹⁴Yehovah, ekasana p̃a wo dip̃adoa naatagu? Ekasana p̃a wo dasuru ki naraem̃a paki nau?

¹⁵Kinau a dogo kite sa go a m̃aladigi mate pae ragi ni naveinatureaiana aginau pa pa: A dapetape namatau‐ki‐go‐ana maga, a midoakiputuaki p̃arua.

¹⁶Namaetoana vivitinu anigo maga eu dap̃augoro au; Namatau‐ki‐go‐ana maga eu mari au a punuta.

¹⁷Eu dalivirigoro au dakiusi noai maga naaleatia mamau; Eu pei taua dalivirigoro au.

¹⁸Ku mari tea dodomi au go tagu ri ero madu uvea ki nau, Tea maga waina eu atae au, eu doko namaligo.