Read Nguna Togoa Etafe North SALAMO 9 Bible Online

SALAMO 9 - Nguna Togoa Etafe North bible

SALAMO 9

¹Salamo sikai ki David. Aga wo pasadodom̃ata ki Yehovah ki nap̃op̃ogu mamau; Aga wo dogorogo ki nawosiana ni namagaana anigo maga mamau puti.

²Aga wo laelaea po darasa ako: Aga wo lega‐samasamani nagisam̃a, nigo Tea Vakilagi mau O.

³Ragi waina tea kokona ki nau maga eu liliu pano, Eu do dapilagona po do puoli pa dua ki naraem̃a.

⁴Nalakena ku mari navasap̃otaeana aginau go navululuana aginau; Ku dasake malo tasake po do pasap̃otae leana.

⁵Ku pasa kasua ki nalauna maga, ku maripuoli ki tea sigisigileo maga, Ku kasilua nagisada pa pa e du du po du mau du.

⁶Tea kokona maga eu nopu, eu pei maso maladi pa pa e du mau du; Go natokoana maga waina ku pakulua ra, Namidoa‐ki‐da‐ana e puoli.

⁷Ma Yehovah e do dasake e pei nawota pa pa e du mau du: E lawokilaketoko malo tasake aneana naga ega vasap̃otae.

⁸Go nae ega wo pasap̃otae gara maramana, Ega wo magi narei maga pasap̃otae leana.

⁹Go Yehovah ega wo magi tea marip̃oworiana pei tokora vakilagi sikai, Tokora vakilagi sikai ragi maga ni nariesokiana;

¹⁰Go tea maga waina eu atae nagisam̃a euga wo pavatu ako; Nalakena ku da doropusi tea maga waina eu do laaga ako mau, Yehovah O.

¹¹Kuga lega‐samasamani Yehovah waina e doko Sion: Kuga rogorogo ki namariana aneana maga m̃aleoputo ni narei maga.

¹²Nalakena tea waina e do datago nada e midoa ki da: E da malio ki nakuapiosoana ki tea rogokitesa maga mau.

¹³P̃a saup̃ia ki nau, Yehovah O; P̃a vunusi narogokitesaana aginau pae tea maga waina eu do pilosi au, Nigo waina ku do sike au m̃elu dua ki namata‐pua maga ni namateana;

¹⁴Naga aga rogorogo ki nasamasamani‐ko‐ana mamau: Namata‐pua maga ki Sion natuna nagoroi, Aga wo sokamidi namautipauriana anigo ara.

¹⁵Nalauna maga eu diro m̃orutano waina eu dum̃ada kili a: Kup̃ena waina eu dasuru ki nia nam̃eleda e pei tea solisokiana asa.

¹⁶Yehovah e pei tea ataeana, e mari navasap̃otaeana: Tea sigisigileo e pei tea soliana ki nawosiana ni nam̃elearuna maga. Namidodoana. Selah.

¹⁷Tea sigisigileo maga euga wo liliu pano pa pa paki Sheol, Nalauna maga mamau puti waina eu do malio ki Sup̃e.

¹⁸Nalakena tea tika ega wo da pei tea maliokiana sara ragi mau, Naleogoroana ki tea matemate maga ega wo da puoli pa pa ega tu mau du mau.

¹⁹P̃a tuleana, Yehovah O, naatam̃oli ega ta marimatua mau: Nalauna maga euga vei tea vasap̃otaeana kivea ki naraem̃a.

²⁰P̃a mari ra euga mataku, Yehovah O: Nalauna maga euga tum̃ada atae ra naga eu pei naatam̃oli. Selah.