Read Nguna Togoa Etafe North SALAMO 90 Bible Online

SALAMO 90 - Nguna Togoa Etafe North bible

SALAMO 90

¹Natapasavasaana sikai ki Moses, naatam̃oli ki Sup̃e. Nawota, nigo ku maginami pei nasum̃atokoana sikai. Tagona go tagona.

²Ragi waina tava maga eu ko da pakilina mau, Go ragi waina ku ko da piragi navanua go maramana mau, Pae ragi vea mau pa pa paki ragi edaku mau, nigo ku pei Sup̃e doko.

³Ku do mari naatam̃oli e liliu pa pa paki nam̃otam̃ota, Go ku do naga, Kuga liliu, naatam̃oli natuna maga.

⁴Nalakena natau manu sikai namatam̃a Eu dapala nanova ragi waina e do pano, Go dapala navavaigoroana sikai ni nap̃ogiana.

⁵Ku do dapelua ra dapala ki natave sikai; eu dapala namaturuana sikai: Malip̃ogi eu dapala nam̃enau waina e do ulua sake.

⁶Malip̃ogi e pum̃a, po ulua sake; Ragi melu e pei tea tagaukotoviana, po do kokolo.

⁷Nalakena au do sirinopu doko namaetoana anigo, Go au do m̃anaunau doko namaritausuana anigo.

⁸Ku lawo ki namarinaleotageleana aginami maga eu doko kivea ki‐go, Namarinaleosaana sili aginami maga eu doko namarama ni naraem̃a.

⁹Nalakena naaleatia aginami maga mamau puti eu pano doko namaritausuana anigo: Au mari natau aginami maga eu sirinopu dapala namidodoana sikai.

¹⁰Naaleatia maga ni natau aginami maga natau rualima larua eu doko ara, Go au pe kasua, rualima eu pe latolu; Go naleomadagaana kakada e pei nawosimawosaana go nasusueana; Nalakena e pano m̃araverave, go au diri pano.

¹¹Sei e atae nakasuaana ni namaetoana anigo, Go, pae namatau‐ki‐go‐ana, namaritausuana anigo?

¹²Dapala nogoe p̃a mari gami auga veve atae naaleatia aginami maga, Go auga wo piragi p̃op̃o manumatua sikai.

¹³P̃a liliu, Yehovah O; p̃a wo puoli ki gami pa pa paki seve ragi? Go p̃a midoakipiri nalo ni tea suasua anigo maga.

¹⁴P̃a mari gami auga maro malip̃ogi ki nadodomiana anigo; Go auga wo kolalaelaea po laelaea naaleatia aginami maga mamau puti.

¹⁵P̃a mari gami auga laelaea ega vae naaleatia maga waina ku mari gami au dogo kite sa ara, Natau maga waina au punusi tea sa ara.

¹⁶Nawosiana anigo ega vakilina ki tea suasua anigo maga, Go nasamasamaana anigo ega toko natuda maga.

¹⁷Go namasauniana ki Yehovah Sup̃e aginami ega toko gami: Go nawosiana ni nam̃elearugami maga p̃a lawokilaketoko asa doko gami; Go nawosiana ni nam̃elearugami maga p̃a lawokilaketoko asa.