Read Nguna Togoa Etafe North SALAMO 91 Bible Online

SALAMO 91 - Nguna Togoa Etafe North bible

SALAMO 91

¹Tea waina e doko tokora ni natokolokuana ki Tea Vakilagi mau Ega wo m̃enaki melu ni Tea Kasua mau.

²Aga wo noa ki Yehovah, Tokora ni nasavasiliana aginau, go nasum̃a ni p̃aaka aginau; Sup̃e aginau, waina a do pavatu asa.

³Nalakena nae ega wo pualua ko pa dua ki vaivai ki tea valako ki manu, Pa dua ki nasasanaana ni namateana ni namarisakiana maga.

⁴Ega wo kovagoro ko ki nam̃auna maga, Go p̃a wo sava sili etano ki nalivaruna maga: Nalomauana aneana e pei nakokoro go nakoro.

⁵P̃a wo da mataku nalakena tea mataukiana ni p̃ogi mau, Nalakena nalua waina e do diri aleati mau;

⁶Nalakena nasasanaana ni namateana waina e do surata namaligo mau, Nalakena namarisakiana waina e do marisaki aleati matua mau.

⁷Manu sikai euga wo dowo pisari nap̃irikiam̃a. Go tivilia sikai pisari nam̃elearum̃a ni matua; Ega wo da umai paki m̃aladigi ki‐go mau.

⁸Ma p̃a wo leo ki namatam̃a maga, Po punusi nalagatipituakiana paki tea sigisigileo maga.

⁹Nalakena nigo, Yehovah O, ku pei tokora ni nasavasiliana aginau! Ku mari Tea Vakilagi mau e pei nasum̃atokoana anigo;

¹⁰Te nasaana ega wo da pakilina ki‐go mau, Go te naatugiana sikai ega wo da paki m̃aladigi ki tap̃aup̃au anigo mau.

¹¹Nalakena ega wo dip̃a ki agelo aneana maga nalo kakam̃a, Naga euga vavaigoro ko napua anigo maga mamau puti.

¹²Euga wo dapetape ko doko nam̃elearuda maga, Naga p̃a ta dapilagona te vatu sikai mau.

¹³P̃a wo pasi laion go adder: P̃a wo pasi puludoa laion tureai go m̃aata.

¹⁴Nalakena nap̃op̃ona e puluti au, go aga wo pualua e: Aga wo sike a pakilagi, nalakena e atae nagisagu.

¹⁵Ega wo pioso paki nau, go aga wo pasadara e; Kinau aga wo sikoti a doko nariesokiana: Aga wo pualua e, po dodomadagani a.

¹⁶Aga wo mari a ega wo maro navarauana ni naaleatia maga, Go aga wo pisei ki nia namautipauriana aginau.