Read Nguna Togoa Etafe North SALAMO 92 Bible Online

SALAMO 92 - Nguna Togoa Etafe North bible

SALAMO 92

¹Salamo sikai, Nalegaana sikai agi naaleatia ni sabbath. E p̃ia naga auga vasadodom̃ata ki Yehovah, Go naga auga lega‐samasamani nagisam̃a, Tea Vakilagi mau O:

²Naga auga rogorogo ki nadodomiana anigo malip̃ogi, Go naveilomauana anigo nap̃ogiana maga,

³Pae naleo ni nagalo rualima sikai, go pae salteri; Pae nasaruruana ni harp.

⁴Nalakena ku mari au a laelaea, Yehovah, ki nawosiana anigo: Aga wo kola‐laelaea namariana maga ni nam̃elearum̃a maga.

⁵Namariana anigo maga eu p̃arua pa, Yehovah O! Namidodoana anigo maga eu pakipua p̃arua liu.

⁶Naatam̃oli waina e pei wago e da atae mau; Go tea waina e pei lala e da midoakiatae tea wanogoe mau:

⁷Ragi waina tea sigisigileo maga eu do siria dapala nam̃enau, Go tea maga mamau puti waina eu do mari namarinaleotageleana eu do pum̃a; E pei naga euga vei tea marisakiana pa pa ega tu mau du:

⁸Ma nigo ku pei Tea Vakilagi mau pa pa e du mau du, Yehovah O.

⁹Nalakena, p̃a leo, tea kokona ki‐go maga Yehovah O, Nalakena, p̃a leo, tea kokona ki‐go maga euga wo mate puoli; Tea maga mamau puti waina eu do mari namarinaleotageleana euga wo pei tea taperaverakiana.

¹⁰Ma ku sike pakilagi ki napati ni nap̃augu e dapala napati ni nap̃au ni oks mila: A pei tea vuvuraikiana ki naroro malakesa.

¹¹Go namatagu e leopunusi tea kusugoro au maga, Nadaligagu ero dogo tea mari naleo sa maga waina eu duleana dip̃a au.

¹²Tea leana ega wo siria dapala paama sikai: Ega wo ulua dapala sidar sikai ni Lebanon.

¹³Tea maga waina eu pei tea lawoana nasum̃a ki Yehovah. Euga wo do siria roara maga ni nasum̃a ki Sup̃e anigida.

¹⁴Euga wo do dau ki nawada ragi waina euga wo pei tea matua; Euga wo pura ki nasua po malakesa doko:

¹⁵Naga euga rogorogo naga Yehovah e leana; E pei vatu‐laketoko aginau, go te namarinaleotageleana e da doko asa mau.