Read Nguna Togoa Etafe North SALAMO 94 Bible Online

SALAMO 94 - Nguna Togoa Etafe North bible

SALAMO 94

¹Sup̃e ni nasikosikoana maga, Yehovah O, Sup̃e ni nasikosikoana maga, p̃a maramalaga dave.

²P̃a tum̃am̃a sike ko pakilagi, Tea Vasap̃otae maramana: P̃a mari namariana ki tea leomadaga maga ega liliu paki da.

³Yehovah, tea sigisigileo maga euga wo darasa pa pa paki seve ragi? Tea sigisigileo maga euga wo darasa pa pa paki seve ragi?

⁴Eu do lua ki navasaana, eu do pasa paka laapa, eu do dum̃ada noa ara, Tea maga mamau puti waina eu do mari namarinaleotageleana.

⁵Eu do marip̃oraworae narei anigo, Yehovah O, Go eu do mari tea veaniana anigo eu dogokitesa.

⁶Eu do maripunue nagoroi malepu go nam̃enaki, Go eu do p̃okapunue namalepu maga.

⁷Go eu do naga, Yah ega wo da punusi mau, Go Sup̃e ki Yakob ega wo da midoa ki nia mau.

⁸Kuga midodoa, tea vei wago maga m̃aleoputo ni narei: Go tea vei lala maga, kuga wo manumatua seve ragi?

⁹Tea waina e do lawo ki nadaliga, ega wo da dogo kite? Tea waina e do maridawona ki namata, ega wo da punusi kite?

¹⁰Tea waina e do pasa kasua ki nalauna maga ega wo da parati kite? Tea waina e do pasapisei ki naatam̃oli naataeana?

¹¹Yehovah e do atae namidodoana maga ki naatam̃oli, Naga nara eu pei tea p̃alo.

¹²Ae namaropaana ki naatam̃oli waina ku do pasakasua ki nia, Yah O, Po do pasapisei ki nia m̃elu nawotaeana anigo!

¹³Naga p̃a mari a ega tam̃ate doko pa dua ki naaleatia maga ni nasaana, Pa pa m̃orutano sikai ega wo pei tea kiliana raki tea sigisigileo.

¹⁴Nalakena Yehovah ega wo da dip̃adoa narei aneana mau, Go ega wo da doropusi tea veaniana aneana mau.

¹⁵Nalakena navasap̃otaeana ega wo liliu umai paki namarinaleoleanaana: Go tea p̃op̃o‐leana maga mamau puti euga wo dausi a.

¹⁶Sei ega wo maginau duleana dip̃a tea maga waina eu do mari naleo sa? Sei ega wo maginau lawodu dip̃a tea maga waina eu do mari namarinaleotageleana?

¹⁷Yehovah e pe ta maginau pei nasilaeana mau, Naatagu e pe toko tokora ni navunutaana m̃araverave.

¹⁸Ragi waina a naga, Nam̃elegu e pa parasai; Nadodomiana anigo, Yehovah O, e do silae au.

¹⁹Ragi ni namidoakiparatikiana laapa nap̃alaugu, Navasapakavakaleana anigo maga eu mari naatagu e laelaea.

²⁰Malo tasake ni nasigisigileoana ega wo saisai peani sikoti ko, Waina e do maridawona ki narogokitesaana pae natawonakiana sikai kite?

²¹Eu do saisai dip̃a naata ni tea leana, Go eu do dip̃akotovi nada tautau.

²²Ma Yehovah e maginau pei tokora vakilagi sikai; Go Sup̃e aginau e pei vatulaketoko ni nasavasiliana aginau.

²³Go e do mari namarinaleotageleana adeada e liliu paki da, Go ega wo daelua ra doko nasigisigileoana adeada; Yehovah Sup̃e anigida ega wo daelua ra.