Read Nguna Togoa Etafe North SALAMO 95 Bible Online

SALAMO 95 - Nguna Togoa Etafe North bible

SALAMO 95

¹Kuga umai, tuga kola‐laelaea paki Yehovah: Tuga marip̃arai laelaea paki vatu‐laketoko ni namautipaurigida‐ana.

²Tuga vaki kivea ki naraena pilake navasadodom̃atakiana, Tuga marip̃arai laelaea paki nia ki nalegaana maga.

³Nalakena Yehovah e pei Sup̃e warua sikai, Go Nawota warua sikai dap̃au sup̃e maga mamau puti.

⁴Waina tokora vakipua maga ni maramana eu doko nam̃elearuna; Go tokora vakilagi maga ni tava maga eu pei aneana.

⁵Waina natasi e pei aneana, go nae e mari a; Go nam̃elearuna ero maridawona ki navanua garagara.

⁶Kuga umai, tuga lotu, po kolo; Tuga titip̃atua narae ni Yehovah, Tea Maridawona ki gida:

⁷Nalakena nae e pei Sup̃e anigida, Go nigida tu pei narei ni napega aneana, go shiip ni nam̃elearuna. Masoso, ku pe wo dogo parati ki nadaleona!

⁸Kuga ta mari nap̃op̃omu ega kasua mau, dapala waina eu mari a Meribah, Dapala waina eu mari a naaleatia ni Massah masop̃alo.

⁹Ragi waina tamamu maga eu maridogo au, Eu maridogo‐ataep̃otae au, po punusi nawosiana aginau.

¹⁰Natau rualima pati a mamarago ki tagona wanogoe, Po naga, Nara eu pei narei waina eu do sasap̃o ki nap̃op̃oda, Go eu da atae napua aginau maga mau:

¹¹Waina a pivisa paki da namaetoana aginau, Naga euga ta umai sili paki namaromaroana aginau mau.