Read Nguna Togoa Etafe North SALAMO 96 Bible Online

SALAMO 96 - Nguna Togoa Etafe North bible

SALAMO 96

¹Kuga lega ki Yehovah nalegaana vau sikai: Kuga lega ki Yehovah, maramana mamau.

²Kuga lega ki Yehovah, kuga vasap̃ia ki nagisana; Kuga rogorogo ki namautipauriana aneana pae naaleatia pa pa paki naaleatia.

³Kuga noasai nasamasamaana aneana m̃aleoputo ni nalauna maga, Nawosiana ni namagaana aneana maga m̃aleoputo ni narei maga mamau puti.

⁴Nalakena Yehovah e p̃arua, go e pei tea waina ega vei tea lega‐samasamaniana warua liu: Nae e pei tea waina ega vei tea mataukiana dap̃au sup̃e maga mamau puti.

⁵Nalakena sup̃e maga mamau puti ni nalauna maga eu pei nasup̃e maga: Ma Yehovah e mari nakoroatelagi maga.

⁶Nadodomadaganiana go natatap̃auana ero doko naraena: Nakasuaana go nasamasamaana ero doko tokora tapu aneana.

⁷Kuga tua Yehovah, naworaworana maga ni nalauna maga, Kuga tua Yehovah nasamasamaana go nakasuaana.

⁸Kuga tua Yehovah nasamasamaana ni nagisana: Kuga tape navituaana sikai, po umai paki roara maga ni nasum̃a aneana.

⁹Kuga suai natano paki Yehovah doko narekeikiana ni natapuana: Kuga rurururu pa dua ki naraena, maramana mamau.

¹⁰Kuga noa m̃aleoputo ni nalauna maga, Yehovah e do maramara: Go maramana e pei tea lawokilaketokoana, ega wo da parivari mau: Ega wo pasap̃otae narei maga pae naleanaana.

¹¹Nakoroatelagi maga euga laelaea, go maramana ega sokamidi; Natasi ega saruru, go navuraana kakana;

¹²Vanua ega rarasa, go tea maga mamau puti waina eu doko asa; Ragi wanogoe nakau maga mamau puti ni mala ni nakau euga wo kola‐laelaea;

¹³Narae ni Yehovah, nalakena e umai; Nalakena e umai naga ega vasap̃otae navanua: Ega wo pasap̃otae maramana pae namarinaleoleanaana, Go nalauna maga pae naveilomauana aneana.