Read Nguna Togoa Etafe North SALAMO 97 Bible Online

SALAMO 97 - Nguna Togoa Etafe North bible

SALAMO 97

¹Yehovah e do maramara; navanua ega sokamidi; Go naureure laapa euga laelaea.

²Napopouru go namaligo ero doko dalivirigoro e: Namarinaleoleanaana go navasap̃otaeana ero pei laketano ni malo tasake aneana.

³Nakapu sikai e do pea ki naraena, Po do gani tea kokona ki nia maga daliviri.

⁴Navila aneana maga eu maramalagati maramana: Navanua e punusi, po durururu.

⁵Tava maga eu sara dapala waks pa dua ki narae ni Yehovah, Pa dua ki narae ni Nawota ni maramana mamau.

⁶Nakoroatelagi maga eu do dogorogo ki namarinaleoleanaana aneana, Go nalauna maga mamau puti eu punusi nasamasamaana aneana.

⁷Tea maga mamau puti waina eu do magi nasup̃e taeana sikai suasua, Waina eu do pasapakavakae nasup̃e maga euga wo maliere: Kuga suai natano paki nia, sup̃e maga mamau puti.

⁸Sion e dogo po laelaea, Go Yudah natuna nagoroi maga eu sokamidi; Nalakena navasap̃otaeana anigo maga, Yehovah O.

⁹Nalakena nigo, Yehovah, ku pei Tea Vakilagi mau dap̃au maramana mamau: Ku pei Tea Vakilagi p̃arua liu dap̃au sup̃e maga mamau puti.

¹⁰Tea maga waina ku dodomi Yehovah, kuga vilosi tea sa: E do pavaigoro naata maga ni tea dodomi‐dodomiana aneana maga; Ega wo pualua ra m̃elu dua ki nam̃elearu ni tea sigisigileo maga.

¹¹Namarama e magi tea leana pei tea sapurakiana, Go agi tea p̃op̃o‐leana maga nalaelaeaana.

¹²Kuga laelaea Yehovah, tea leana maga. Go kuga vasadodom̃ata ki nagisana tapu.