Read Nguna Togoa Etafe North SALAMO 99 Bible Online

SALAMO 99 - Nguna Togoa Etafe North bible

SALAMO 99

¹Yehovah e do maramara; nalauna maga euga rurururu: E do doko kerub maga; navanua ega varivari.

²Yehovah waina e doko Sion e p̃arua; Go nae e pakilagi dap̃au nalauna maga mamau puti.

³Euga samasamani nagisam̃a waina e p̃arua go waina e pei tea mataukiana: Nae e dapu.

⁴Go nakasuaana ki Nawota e dodomi navasap̃otaeana; Nigo ku lawokilaketoko naleanaana, Nigo ku mari navasap̃otaeana go namarinaleoleanaana doko Yakob.

⁵Kuga sike Yehovah Sup̃e anigida ega vakilagi, Go kuga suai natano paki malo vasiana ni nam̃elena maga: Nae e dapu.

⁶Moses go Aaron m̃aleoputo ni tea viri aneana maga, Go Samuel m̃aleoputo ni tea maga waina eu do pioso‐noa nagisana; Eu pioso paki Yehovah go nae e pasadara ra.

⁷E pasa paki da doko napopouru lawodu: Eu pavaigoro nanoasokisokiana aneana maga, go natawonakiana waina e dua ra asa.

⁸Yehovah Sup̃e aginami, nigo ku pasadara ra: Ku madeada pei Sup̃e midoakikorokoro, Go tea sikosiko namariana adeada maga.

⁹Kuga sike Yehovah Sup̃e anigida ega vakilagi, Go kuga suai natano paki tava tapu aneana; Nalakena Yehovah Sup̃e anigida e dapu.