Read Nguna Togoa Etafe North NALULUAKIA MAGA 1 Bible Online

NALULUAKIA MAGA 1 - Nguna Togoa Etafe North bible

NALULUAKIA MAGA 1

¹Naluluakia maga ki Solomon, natu ni David, nawota ni Israel:

²Naga naatam̃oli euga atae namanumatuaana go navasapiseikiana; Naga euga midoakiatae navasaana maga ni namidoakiataeana;

³Naga euga tape navasapiseikiana ni namidoakiataeana, Ni namarinaleoleanaana go navasap̃otaeana go naleanaana;

⁴Naga euga vitua ki namarimatuaana dua tea manumatavusa, Ki naataeana go namidoakip̃otaeana dua natureai:

⁵Naga tea manumatua ega rogo, po sokari naataeana; Go naga tea midoakiatae ega talua namarakiana:

⁶Naga ega midoakiatae naluluakia, go nanoap̃otaeana kakana; Navasaana maga ki tea manumatua, go navasamaluluakiana adeada maga.

⁷Namatau‐ki‐Yehovah‐ana e pei naatulakeana ni naataeana: Ma tea manumatavusa eu midoakip̃alo ki namanumatuaana go natapavanauana.

⁸Natugu, p̃a rogo natapavanauana ki tamam̃a, Go p̃a ta doropusi navasapiseikiana ki p̃ilam̃a mau:

⁹Nalakena nara eroga wo pei vauvau sikai ni nasaup̃iaana agi nap̃aum̃a, Go namori maga agi nanoam̃a.

¹⁰Natugu, tea mari naleo sa maga eu pe surue ko, Pa ta suasua mau.

¹¹Eu pe naga, P̃a umai sikoti gami, tuga kusugoro raki nada, Tuga tokoloku raki tea tautau, nalakena ega tika;

¹²Tuga dinomi pulemauri ki da ega tapala Sheol, Go tea wia lua maga, euga tapala tea maga waina eu siwo paki m̃oru;

¹³Tuga wo pap̃ai sara naleo wia ni naulu laapa, Tuga wo pakavuro nasum̃a anigida maga ki tea vutiluapavakotoana;

¹⁴Pa nadi ki gole anigo sikoti gami; Tuga wo mamau puti peani nala ni m̃ane sikai maau:

¹⁵Natugu, p̃a ta surata pae napua sikoti ra mau; Pa mauti nam̃elem̃a ki napua adeada:

¹⁶Nalakena nam̃eleda eu do sava paraki tea sa, Go eu mari m̃araverave naga euga taki nada.

¹⁷Nalakena kup̃ena e pei tea welesaki‐m̃oli‐ki‐ana, Namata ni te manu sikai:

¹⁸Go nara eu do kusugoro raki adeada nadada, Eu do dokoloku raki namauriana adeada maga.

¹⁹Napua maga ki sara naata waina eu do dapepavakoto ki nataluaana, eu dapala nogoe; E do dape lua namauriana ki talakeana maga.

²⁰Namanumatuaana e do pioso kasua napua ni natokoana; E do pitua ki nadaleona tokora welewelea maga;

²¹E do pioso nap̃au ni napua maga ni nasaisaiana; Namasova ni namata pua maga, E do noa nanoaana aneana maga natokoana: e naga,

²²Pa pa paki seve ragi, tea manumatavusa maga, Kuga wo dodomi namanumatavusaana? Go tea marisaudoa maga euga wo maro namarisaudoaana? Go tea veilala maga euga vilosi naataeana?

²³Kuga maradoa nalakena navasakasuakiana aginau: Kuga leo, aga wo daki naatagu dua mu, Aga wo mari mu kuga atae navasaana aginau maga.

²⁴Nalakena a pioso, go ku karai; A sai ki nam̃elearugu, go te naata e da dakidorogo mau;

²⁵Ma ku midoakip̃alo ki sara navasaparatikiana aginau, Go ku da masau te navasakasuakiana aginau mau:

²⁶Kinau ma aga wo muru ragi ni namarisaki‐mu‐ana; Aga wo pasasaudoa ragi waina namatakuana animu ega wo umai;

²⁷Ragi waina namatakuana animu ega wo umai dapala nalagi atu sikai, Go namarisaki‐mu‐ana ega wo umai dapala suitaviro sikai; Ragi waina nariesokiana go narogokitesaana eroga wo umai pa parati ki mu.

²⁸Ragi wanogoe euga wo pioso paki nau, Ma aga wo da pasadara mau; Euga wo laaga au, Ma euga wo da pap̃ai au mau:

²⁹Nalakena eu pilosi naataeana, Go eu da matadoa namatauki Yehovah‐ana mau:

³⁰Eu da masau namidoakip̃otaeana aginau mau; Eu dip̃adoa sara navasakasuakiana aginau:

³¹Nalakena tea wanogoe euga wo gani nawa ni napua adeada, Po puka ki namidoakip̃otaeana adeada maga.

³²Nalakena namaradoa‐pano‐ana ki tea manumatavusa maga ega wo maripunue ra, Go natokodam̃ateana ki tea veilala maga ega wo maripuoli ki da.

³³Ma tea waina e do dogo parati ki nau ega wo doko pavatu, Go ega wo doko dam̃ate masale ki namatakuana ni tea sa.