Read Nguna Togoa Etafe North NALULUAKIA MAGA 10 Bible Online

NALULUAKIA MAGA 10 - Nguna Togoa Etafe North bible

NALULUAKIA MAGA 10

¹Naluluakia maga ki Solomon. Natu naanoai manumatua sikai e mari tamana e laelaea: Ma natu naanoai sikai waina e pei lala e pei nasusueana ki p̃ilana.

²Naloriki tauakiana maga ni namarinaleotageleana eu da silae mau: Ma namarinaleoleanaana e do pualua m̃elu dua ki namateana.

³Yehovah ega wo da suasua ki naata ni tea leana ega vitolo mau: Ma e do dip̃adoa namasauana ki tea sigisigileo maga.

⁴Nam̃elearu toroana e do mari e pei tea tika: Ma nam̃elearu ni tea m̃arekareka e do mari e pei sogolapa.

⁵Tea waina e do pila daua ki ragi ni navivitinuana e pei natu naanoai sikai waina e do midoakiatae: Ma tea waina e maturu ragi ni natagaukotoviana e pei natu naanoai sikai waina e do mari tea malierekiana. Navasap̃iaana maga eu doko nap̃au ni tea leana:

⁶Ma namarisakiana e do dap̃augoro nawoka ni tea sigisigileo maga.

⁷Namidoakiana ni tea leana e pei tea vasap̃iakiana: Ma nagisa ni tea sigisigileo maga ega wo madada.

⁸Tea p̃op̃o manumatua ega wo dape natip̃akiana maga: Ma tea vasa‐oli‐lala ega wo dowo.

⁹Tea waina e do surata pae nawialuaana e do surata pae navavatuana: Ma tea waina e do puadoa napua aneana maga ega wo pei tea ataeana.

¹⁰Tea waina e do p̃ilimata ki namatana e mari narogokitesaana: Ma tea vasa‐oli‐lala ega wo dowo.

¹¹Nawoka ni tea leana e pei namata noai ni namauriana: Ma namarisakiana e do dap̃augoro nawoka ni tea sigisigileo maga.

¹²Navilosiana e do pulevule navileana maga: Ma nadodomiana e do dap̃augoro natapiriana maga mamau puti.

¹³Namanumatuaana e pei tea vap̃aiana nagole ni tea waina e midoakiatae: Ma nakau varati e pei agi nam̃adu ni tea waina e dika ki namidoakiataeana.

¹⁴Tea manumatua maga eu do daua ki naataeana: Ma nawoka ni tea manumatavusa e pei namarisakiana waina e pei m̃aladigi.

¹⁵Nasogolapaana ki tea sogolapa e pei natokoana ni nakasuaana aneana: Namarisakiana ni tea tika maga e pei natikaana adeada.

¹⁶Nawosiana ki tea leana e paraki namauriana: Tea taluaana ki tea sigisigileo e paraki namarinaleosaana.

¹⁷Tea waina e do pavaigoro natapavanauana e doko napua ni namauriana: Ma tea waina e dogopiri navasakasuakiana e sasap̃o.

¹⁸Tea waina e do dasuru ki navilosiana e peani gole sorosoro; Go tea waina e do dogorogo ki navinoaana sikai, nae e pei lala.

¹⁹Nalaapaana ni navasaana natapiriana e da dika asa mau: Ma tea waina e mari daliali pasa e mari pae namanumatuaana.

²⁰Namena ni tea leana e dapala silver matadoaana: Nap̃op̃o ni tea sigisigileo e pei nalo p̃alo.

²¹Nagole ni tea leana e pagani tea laapa: Ma tea manumatavusa maga eu mate ki natikaana ni namidoakiataeana.

²²Navasap̃iakiana ki Yehovah, nae e do mari e pei sogolapa, Go nawosimawosaana e da sokari a mau.

²³E dapala namarisaudoaana ki tea veilala naga ega mari nawosiana sa: Ma namanumatuaana e pei agi naatam̃oli ni namidoakiataeana.

²⁴Tea mataukiana ki tea sigisigileo, nae ega wo pa parati ki nia: Go tea masauana ki tea leana ega wo pei tea vituakiana.

²⁵Dapala waina suitaviro e liu pano, tea sigisigileo e da moro doko: Ma tea leana e pei laketano sikai waina e du mau du.

²⁶Dapala waine kokona paki napati maga, go naasua paki namata maga, Tea mamale e dapala nogoe paki tea maga waina eu dautau sa.

²⁷Namatau‐ki‐Yehovah‐ana e do sokari naaleatia maga: Ma natau maga ki tea sigisigileo maga euga wo puru.

²⁸Naleogoroana ki tea leana maga ega wo pei nalaelaeaana: Ma naleogoroana ki tea sigisigileo maga ega wo puoli.

²⁹Napua ki Yehovah e magi tea leana pei p̃aaka sikai; Ma e pei namarisakiana sikai paki tea maga waina eu do mari namarinaleotageleana.

³⁰Tea leana ega wo da parivari mau pa pa ega tu mau du: Ma tea sigisigileo maga euga wo da doko navanua doko mau.

³¹Nawoka ni tea leana e do putaputa ki namanumatuaana: Ma namena ni namarisoreana ega wo pei tea masikotoviana.

³²Nagole ni tea leana e atae tea waina e pei tea midoakim̃atakiana: Ma nawoka ni tea sigisigileo maga e do pasa namarisoreana.