Read Nguna Togoa Etafe North NALULUAKIA MAGA 13 Bible Online

NALULUAKIA MAGA 13 - Nguna Togoa Etafe North bible

NALULUAKIA MAGA 13

¹Natuna manumatua e dogo navasapiseikiana ki tamana: Ma tea vasasaudoa e da dogo navasakasuakiana mau.

²Naatam̃oli ega wo gani tea wia m̃elu nawa ni nawokana: Ma naata ni tea mari malauweluki ega wo gani namaripavakotoana.

³Tea waina e leo parati ki nawokana e pavaigoro namauriana aneana: Ma tea waina e pasa p̃aragoto ega wo dum̃ana mari sa ki nia.

⁴Naata ni tea mamale e masau, go e da peani mau: Ma naata ni tea m̃arekareka ega wo pei tea mariana ega m̃anopunopu.

⁵Naatam̃oli leana e pilosi nasorosoroana: Ma naatam̃oli sigisigileo e pei tea mamaragokiana, go ega wo umai paki namatamalierekiana.

⁶Namarinaleoleanaana e leo parati ki tea waina e leana napua; Ma nasigisigileoana e dosiva ki tea mari naleo sa.

⁷Tea sikai e doko waina e dum̃ana mari a e pei sogolapa, go e da peani te navatuna mau: Tea sikai e doko waina e dum̃ana mari a e pei tea tika, go e peani nasogolapaana warua.

⁸Naulu ni natauluaana ni namauriana ki naatam̃oli sikai e pei nasogolapaana aneana: Ma tea tika e da dogo navasakasuakiana mau.

⁹Namarama ki tea leana e laelaea: Ma nasulu ki tea sigisigileo ega wo pei tea vunueana.

¹⁰Nap̃op̃ovakilagiana e pei nalake ni navileana: Ma namanumatuaana e sikoti tea maga waina eu dape navasaparatikiana.

¹¹Nasogolapaana waina e pei tea tapem̃olikiana ega wo disu pakitano: Ma tea waina e pila daua ki pae nawosiana ega wo peani tea warua.

¹²Naleogoroana varau e mari nap̃op̃o e susue: Ma ragi waina tea masauana e umai, e pei nakau ni namauriana.

¹³Tea waina e midoakip̃alo ki navasaana, e dum̃ana puati namarisakiana umai paki nia: Ma tea waina e matauki natip̃akiana ega wo doko dam̃ate.

¹⁴Nawotaeana ki tea manumatua e pei namata ni noai ni namauriana, Naga euga va dua ki vaivai maga ni namateana.

¹⁵Namidoakiataeana wia e pitua ki nasaup̃iaana: Ma napua ki tea mari malauweluki e kasua.

¹⁶Sara naatam̃oli midoakiatae e p̃osiwosi ki naataeana: Ma tea manumatavusa e pisei ki namanumatavusaana aneana.

¹⁷Tea tautauana sigisigileo e dowo paki tea sa: Ma tea tautauana lomau e pei namaripauriana.

¹⁸Natikaana go nadododaoana eroga wo pei agi tea waina e karaikita navasapiseikiana: Ma tea waina e dogo parati ki navasakasuakiana ega wo pei tea dodomadaganiana.

¹⁹Namasauana waina e pei tea vakavuroana e gagadi paki naatagida: Ma e pei tea mamaragokiana paki tea veilala maga naga euga m̃elu dua ki tea sa.

²⁰Tea waina e surata sikoti naatam̃oli manumatua maga ega wo manumatua: Ma tea waina e saisai sikoti tea vei lala maga ega wo pei tea marisakiana.

²¹Tea sa e kopasi tea mari naleo sa maga: Ma tea wia ega wo pei tea lagatipituakiana paki tea leana maga.

²²Naatam̃oli wia e magi natuna maga natuda maga doropusi naveanipiolikiana: Go nasogolapaana ki tea mari naleo sa e magi tea leana maga pei tea tauakiana.

²³Navinaga warua e doko natano kiliana ki tea tika: Ma naloriki e pei tea marisakiana nalakena natikaana ni namidoakiataeana.

²⁴Tea waina e mauti nakau varati aneana e pilosi natuna: Ma tea waina e dodomi a e parati a m̃araverave.

²⁵Tea leana e ganikani pa pa naatana e maro: Ma nap̃ele ni tea sigisigileo ega wo dika.