Read Nguna Togoa Etafe North NALULUAKIA MAGA 14 Bible Online

NALULUAKIA MAGA 14 - Nguna Togoa Etafe North bible

NALULUAKIA MAGA 14

¹Sara nagoroi manumatua e davagi nasum̃a aneana: Ma tea manumatavusa e dakai a ki nam̃elearuna.

²Tea waina e surata naleanaana aneana e matauki Yehovah: Ma tea waina e mari lolop̃ota napua aneana e midoaki p̃alo ki nia.

³Nakau varati ni nap̃op̃ovakilagiana e doko nawoka ni tea manumatavusa: Ma nagole ni tea manumatua ega wo pavaigoro ra.

⁴Tokora waina oks maga eu dika asa, kelu e dautau: Ma nataluaana warua e doko pae nakasuaana ni oks.

⁵Tea noasokisoki lomau e da sorosoro mau: Ma tea noasokisoki sorosoro e do noa nasorosoroana maga.

⁶Tea vasasaudoa e laaga namanumatuaana, po da pap̃ai a mau: Ma naataeana e masalesale paki tea waina e midoakiatae.

⁷P̃a m̃elu dua ki narae ni naatam̃oli waina e pei lala, Ragi waina ku da punusi doko asa nagole ni naataeana mau.

⁸Namanumatuaana ki tea midoakiatae e pei naga ega midoakip̃otae napua aneana: Ma namanumatavusaana ki tea vei lala maga e pei nasorosoroana.

⁹Tea manumatavusa maga eu pasasaudoa ki namarinaleosaana: Ma nasaup̃iaana e doko m̃aleoputo ni tea leana maga.

¹⁰Nap̃op̃o ni naatam̃oli e atae narogokitesaana aneana: Go tea p̃ota sikai e da saisai peani nalaelaeaana aneana mau.

¹¹Nasum̃a ki tea sigisigileo ega wo pei tea rakaiana: Ma tap̃aup̃au ki tea leana ega wo du p̃ia.

¹²Napua sikai e doko waina e leana narae ni naatam̃oli: Ma namatap̃ago edaku kakana e pei napua ni namateana.

¹³Ragi seara naatam̃oli e muru, ma nap̃op̃ona e susue: Go edaku ki nia nalaelaeaana wanogoe e pei nasusueana.

¹⁴Tea p̃op̃o liliu ega wo pei tea vakavuroana ki napua aneana maga: Go naatam̃oli wia ega wo maro ki namidodoana aneana.

¹⁵Tea manumatavusa e saralomau sara navasaana: Ma tea midoakiatae e leo parati ki nasurataana aneana.

¹⁶Tea manumatua e mataku, po m̃elu dua ki tea sa: Ma tea manumatavusa e maritausu, po pavatu doko.

¹⁷Tea waina e maeto m̃araverave ega wo mari navei‐lala‐ana: Go naatam̃oli ni namidoakiana sa maga e pei tea vilosiana.

¹⁸Tea manumatavusa maga eu dape peani navei‐lala‐ana: Ma tea midoakiatae maga eu pei tea pauvaukiana ki naataeana.

¹⁹Tea sa maga eu kolo narae ni tea wia maga: Go tea sigisigileo maga doko namata‐pua maga, ni tea leana.

²⁰Tea tika, tea ni m̃aladigi ki nia ma, e pilosi a: Ma tea vei sogolapa e peani tana laapa.

²¹Tea waina e midoakidao ki tea ni m̃aladigi ki nia, e mari naleo sa: Ma tea waina e maritadodomi tea tika e pei tea vasam̃atakiana.

²²Tea maga waina eu midoakip̃ai tea sa, eu da sasap̃o kite? Ma nadodomiana go nalomauana eroga wo pei agi tea maga waina eu midoakip̃ai tea wia.

²³Nataluaana e doko nawosiana: Ma navasaana m̃oli e paraki natikaana sikina.

²⁴Vauvau ki tea manumatua e pei nasogolapaana adeada: Ma vauvau ki tea vei lala e pei namanumatavusaana adeada.

²⁵Tea noasokisoki lomau e pualua naatam̃oli: Ma tea noasokisoki sorosoro e pasa nasorosoroana.

²⁶Navavatuana kasua e doko namatauki‐Yehovah‐ana: Go natuna maga euga wo peani tokora ni nasavasiliana.

²⁷Namatauki‐Yehovah‐ana e pei namata ni namauriana, Naga tuga va dua ki vaivai maga ni namateana.

²⁸Nasamasamaana ki nawota e doko nalaapaana ni narei: Ma natikaana ni narei e pei namarisakiana ni tea maraki.

²⁹Tea waina e mari daliali naga ega maeto e peani namidoakiataeana wia: Ma tea waina e maeto m̃araverave e sike namanumatavusaana.

³⁰P̃op̃o matemate e pei namauriana ni nap̃okasigida: Ma naroitoiana e pei namadadaana ni navatugida maga.

³¹Tea waina e diesoki tea tika e pasa pinoa ki Tea Tawona ki nia: Ma tea waina e dodomi tea tika e dodomadagani a.

³²Tea sigisigileo e pei tea tosivakiana pano namariana sa aneana: Ma tea leana e pap̃ai nasavasiliana doko nawialuaana aneana.

³³Namanumatuaana e doko nap̃op̃o ni tea waina e midoakiatae: Ma tea waina e doko nap̃alau ni tea vei lala maga ega wo pei tea ataeana.

³⁴Namarinaleoleanaana e sike pakilagi ki nalauna sikai: Ma namarinaleosaana e pei navasapinoakiana sikai paki narei maga.

³⁵Nasaup̃iaana ki nawota e doko tea suasua waina e mari manumatua: Ma namaetoana aneana e doko tea waina e mari tea malierekiana.