Read Nguna Togoa Etafe North NALULUAKIA MAGA 15 Bible Online

NALULUAKIA MAGA 15 - Nguna Togoa Etafe North bible

NALULUAKIA MAGA 15

¹Navasadaraana matemate e mari namaetoana e liliu pano: Ma navasaana kasua e sike namaetoana.

²Namena ni tea manumatua e do noa m̃ata ki naataeana: Ma nawoka ni tea vei lala maga e do lua ki namanumatavusaana.

³Namata ni Yehovah ero doko sara tokora, Ero do leo punusi tea sa go tea wia.

⁴Namatemateana ni namena e pei nakau ni namauriana: Ma navasaana kasua e mari p̃orae naatana.

⁵Tea vei lala sigisigileo e midoaki p̃alo ki natapavanauana ki tamana: Ma tea waina e pavaigoro navasakasuakiana e mari manumatua.

⁶Nasogolapaana warua e doko nasum̃a ki tea leana: Ma natuletuleana e doko tea taluaana maga ki tea sigisigileo.

⁷Nagole ni tea manumatua e sapura ki naataeana: Ma nap̃op̃o ni tea veilala e da mari dapala nogoe mau.

⁸Naviriana ki tea sigisigileo e pei tea mamaragokiana paki Yehovah: Ma natapasavasaana ki tea leana e pei namaroana aneana.

⁹Napua ki tea sigisigileo e pei tea mamaragokiana paki Yehovah: Ma e dodomi tea waina e dausi namarinaleoleanaana.

¹⁰Navaratiana warua e pei agi tea waina e doropusi napua: Go tea waina e pilosi navasakasuakiana ega wo mate.

¹¹Sheol go Abaddon ero doko lina paki Yehovah: Go e dapala nogoe p̃arua liu nalo ni nap̃op̃o ni naatam̃oli natuda maga.

¹²Tea vasa saudoa e da masauna naga ega vei tea vasakasuakiana mau: E karai pa punusi tea manumatua maga.

¹³Nap̃op̃o laelaea e mari narae e daerae p̃ia: Ma ki narogokitesaana ni nap̃op̃o naatana e mawora.

¹⁴Nap̃op̃o ni tea waina e peani namidoakiataeana e laaga naataeana: Ma nawoka ni tea manumatavusa e do gani navei‐lala‐ana.

¹⁵Naaleatia maga mamau puti ki tea rogokitesa eu sa: Ma p̃op̃o laelaea e peani nakaniana sara ragi.

¹⁶Tea kiki pilake namatauki Yehovah‐ana, E p̃ia liu tea tauakiana warua pilake natuletuleana.

¹⁷Nakaniana ni nataputea malakesa, E p̃ia liu oks m̃anopunopu ni kelu pilake navilosiana.

¹⁸Naatam̃oli maritausu e pulevule navululuana: Ma tea waina e mari daliali namaetoana e mari navileana e makoto.

¹⁹Napua ki tea mamale e dapala nakoro ulua ni tea vivitip̃a: Ma napua ki tea leana e pei tea mariana e pei napua lina.

²⁰Natuna manumatua sikai e mari tamana e laelaea: Ma naatam̃oli manumatavusa sikai e midoaki p̃alo ki p̃ilana.

²¹Navei‐lala‐ana e pei nalaelaeaana paki tea waina e dika ki namidoakiataeana: Ma naatam̃oli midoakiatae e mari nasurataana aneana e leana.

²²Navusum̃akiana e pe tika, namidodoana maga eu pei tea m̃oli: Ma tea vusum̃aki maga eu pe laapa, eu pei tea lawosokiana.

²³Naatam̃oli sikai e peani nalaelaeaana navasadaraana ni nawokana: Go navasaana sikai ragi kakana e p̃ia pa!

²⁴Paki tea manumatua napua ni namauriana e sake, Naga ega m̃elu dua ki Sheol ni etano.

²⁵Yehovah ega wo dakai nasum̃a ki tea p̃op̃o vakilagi: Ma ega wo lawosoki kokoi ki nagoroi malepu.

²⁶Namidodoana maga ki tea sigisigileo eu pei tea mamaragokiana paki Yehovah: Ma navasaana maga ki tea p̃op̃o dautau eu pei tea rogom̃atakiana.

²⁷Tea waina e dape pavakoto ki nataluaana e mari duletulea ki nasum̃a aneana: Ma tea waina e pilosi navituaana maga ega wo mauri.

²⁸Nap̃op̃o ni tea leana e midoakiusiusi navasadaraana: Ma nawoka ni tea sigisigileo e lua ki tea sa maga.

²⁹Yehovah e du uvea ki tea sigisigileo: Ma e do dogo natapasavasaana ki tea leana.

³⁰Namarama ni namata e mari nap̃op̃o e laelaea: Go narogorogoana wia e mari navatu maga eu m̃anopunopu.

³¹Nadaliga waina e dogo parati ki navasakasuakiana ni namauriana, E doko m̃aleoputo ni tea manumatua maga.

³²Tea waina e karaikita navasapiseikiana e midoaki p̃alo ki naatana: Ma tea waina e dogo parati ki navasakasuakiana e dalua namidoakiataeana.

³³Namatauki‐Yehovah‐ana e pei navasapiseikiana ni namanumatuaana; Go nap̃op̃ovakitanoana e pea ki nadodomadaganiana.