Read Nguna Togoa Etafe North NALULUAKIA MAGA 16 Bible Online

NALULUAKIA MAGA 16 - Nguna Togoa Etafe North bible

NALULUAKIA MAGA 16

¹Namidoakip̃otaeana maga ni nap̃op̃o eu pei agi naatam̃oli: Ma navasadaraana ni namena e m̃elu Yehovah.

²Napua maga mamau puti ki naatam̃oli eu dautau aneana namatana: Ma Yehovah e do dowogi naatana maga.

³P̃a malulua ki natomariana anigo maga paki Yehovah, Go namidoakip̃otaeana anigo maga euga wo pei tea lawosokiana.

⁴Yehovah e mari sara naleo raki tea kakana: Go tea sigisigileo raki naaleatia ni nasaana.

⁵Sara naata waina e pei p̃op̃o vakilagi e pei tea mamaragokiana ki Yehovah: Nam̃elearu e pe vuati nam̃elearu, ma sogi e pe wo da puoli ki nia mau.

⁶Ki nadodomiana go nalomauana namarinaleotageleana e pei tea kasiluaana: Go ki namatauki‐Yehovah‐ana naatam̃oli e dawasi m̃elu dua ki tea sa.

⁷Ragi waina Yehovah e midoaki m̃ata ki napua maga ki naatam̃oli sikai, E mari tea kokona ki nia maga eu doko dam̃ate paki nia.

⁸Tea kiki waina e pilake namarinaleoleanaana, E p̃ia liu tea taluaana warua waina e da pilake naleanaana mau.

⁹Nap̃op̃o ni naatam̃oli sikai e midoaki napua aneana: Ma Yehovah e lawo‐ki‐laketoko navasiana aneana maga.

¹⁰Navasapuaana e doko nagole ni nawota: Nawokana ega wo da noa malauweluki navasap̃otaeana mau.

¹¹Vatu rowogi go lasa totowo ni naleanaana ero pei tea ki Yehovah: Vatu rowogi maga mamau puti ni nala eu pei nawosiana aneana.

¹²E pei namamaragokiana ki nawota maga naga euga mari nasigisigileoana: Nalakena malo tasake e pei tea lawo‐ki‐laketokoana ki namarinaleoleanaana.

¹³Nagole leana e pei namaroana ki nawota maga; Go eu dodomi tea waina e pasa leana.

¹⁴Namaetoana ki nawota sikai e dapala tea tautauana maga ni namateana: Ma naatam̃oli manumatua sikai ega wo mari a ega tam̃ate.

¹⁵Namarama ni narae ni nawota, namauriana e doko asa; Go nasaup̃iaana aneana e dapala napopouru ni usa edaku.

¹⁶Nataluaana ni namanumatuaana e p̃ia p̃arua pa liu nataluaana ni kold! Go nataluaana ni namidoakiataeana e pei tea waina ega vei tea matadoaana p̃arua liu silver.

¹⁷Napua lapa ki tea leana maga e pei naga euga va dua ki tea sa: Tea waina e pavaigoro napua aneana e pavaigoro naatana.

¹⁸Nalomadagaana e pea ki namarisakiana, Go nap̃op̃ovakilagiana e pea ki narowoana.

¹⁹Nap̃op̃ovakitanoana m̃aleoputo ni tea matemate maga, E p̃ia liu natap̃otaeana ni tea vuti‐lua‐pavakotoana sikoti tea leomadaga maga.

²⁰Tea waina e dogo parati ki navasaana, ega wo pap̃ai tea wia: Go tea waina e pavatu Yehovah, e maropa.

²¹Tea vei p̃op̃o manumatua ega wo pei tea sosoana ki tea midoakiatae. Go nagole gagadi e mari naataeana e do disu.

²²Namidoakiataeana e pei namata noai ni namauriana paki tea waina e peani a: Ma natapavanauana ki tea manumatavusa maga e pei naveilala‐ana adeada.

²³Nap̃op̃o ni tea manumatua e mari nawokana e leana, Go e sokari naataeana ni nagolena.

²⁴Navasaana gagadi maga eu dapala nasum̃a ni honi, E gagadi paki naatana, go e pei namaripauriana paki navatu maga.

²⁵Napua sikai e doko waina e pei tea vunusiana naga e leana paki naatam̃oli: Ma namatap̃ago edaku kakana e pei napua ni namateana.

²⁶Navitoloana ki tea wosiwosi e mari a e dum̃ana maneana p̃osiwosi; Nalakena nawokana e masau p̃arua ki nia.

²⁷Naatam̃oli p̃alo e do midoakip̃ai namarisakiana: Go tea waina e doko nagolena e dapala nakapu soro.

²⁸Naatam̃oli malauweluki e do sapura ki navululuana: Go tea talakolako e do dap̃otae navei‐tana‐ana maga.

²⁹Naatam̃oli mari pavakoto e surue tea ni m̃aladigi ki nia, Go e maraki nia pae napua waina e da p̃ia mau.

³⁰Tea waina e do p̃ili ki namatana, e pei naga ega midoakip̃ai naleo malauweluki maga: Tea waina e alap̃ono nagolena e mari tea sa e pakilina.

³¹Nakapuaraana e pei vauvau ni nasamasamaana, Ega wo pei tea vap̃aiana napua ni namarinaleoleanaana.

³²Tea waina e daliali namaetoana, e p̃ia liu tea kasua; Go tea waina e damaraki naatana, e p̃ia liu tea waina e dape pavakoto natokoana.

³³Gole e pei tea nadikiana paki nala; Ma namidoakip̃otaeana kakana mamau e pei tea ki Yehovah.