Read Nguna Togoa Etafe North NALULUAKIA MAGA 17 Bible Online

NALULUAKIA MAGA 17 - Nguna Togoa Etafe North bible

NALULUAKIA MAGA 17

¹Namagovai garagara ni navinaga pilake natam̃ateana, E p̃ia liu nasum̃a waina e pura ki nakanikaniana pilake navululuana.

²Tea suasua waina e mari manumatua, ega wo maramara dap̃au natu naanoai waina e mari namaliereana, Go ega wo peani namagovai ni tea veanipiolikiana m̃aleoputo ni tamataida maga.

³Lasa veniana e pei tea ki silver, go upu e pei tea ki kold: Ma Yehovah e do maridogo nap̃op̃o maga.

⁴Tea mari naleo sa e midoakisoki nagole sigisigileo; Go tea sorosoro e dakidorogo namena marisore.

⁵Tea waina e mari saudoa ki tea tika, e pasapinoa ki Tea Tawona ki nia: Go tea waina e laelaea namarisakiana, navaratiana ega wo da puoli ki nia mau.

⁶Natuda natuda maga eu pei vauvau ki maariki matua maga: Go nasamasamaana ki natuda maga e pei tamada maga.

⁷Nanoaana wia lua e da pataka ni tea manumatavusa: Parua liu nagole sorosoro e da pataka ni tea maraki.

⁸Navituaana sikai e dapala vatu masauniana wia lua sikai namata ni tea waina e peani a: Sara tokora waina e doa paki asa, e disu p̃ia.

⁹Tea waina e do dap̃augoro natapiriana e do laaga nadodomiana: Ma tea waina e do pasadata mau, e do dap̃otae navei‐tana‐ana maga.

¹⁰Tea waina e peani namidoakiataeana, navasakasuakiana e sili paki asa, Parua liu nawokatiana paka p̃onotia paki tea veilala.

¹¹Naatam̃oli sa e laaga naveip̃auluulu‐ana sikina; Nalakena tea wanogoe tea tautauana dodotika ega wo pei tea tip̃akiana pano dip̃a e.

¹²Naatam̃oli e pe sua bear waina natuna maga eu pei tea tapeluaana kiana, E pe wia liu naga ega sua tea veilala doko navei‐lala‐ana aneana.

¹³Tea waina e pitua ki tea sa dip̃a tea wia, Tea sa ega wo da m̃elu dua ki nasum̃a aneana mau.

¹⁴Naatulakeana ni navululuana e dapala waina noai e pei tea viloki‐piri‐ana: Nalakena tea wanogoe navululuana ega makoto, pea ki navileana e pe vakilina.

¹⁵Tea waina e mari leana ki tea sigisigileo, Go tea waina e dip̃akotovi tea leana, Ero dua pataka sikai pei tea mamaragokiana ki Yehovah.

¹⁶Nasava e pei nalakena naulu sikai e doko nam̃elearu ni tea manumatavusa naga ega vakotovi namanumatuaana, Waina e da peani namidoakiataeana mau?

¹⁷Naveitanaana e do dodomi sara ragi, Go tai sikai e pakilina naga ega vei tea silae raki naaleatia ni nariesokiana.

¹⁸Tea waina e dika namidoakiataeana e du oli tea p̃ota, Go e po pei natuoliana narae ni tea ni m̃aladigi ki nia.

¹⁹Tea waina e dodomi navululuana, e dodomi natapiriana: Tea waina e sike namata‐pua aneana pakilagi, e laaga namarisakiana.

²⁰Tea waina e peani p̃op̃o tagele, e da pap̃ai nawiaana mau: Go tea waina e peani namena pasa lolop̃ota, e dowo paki namarisakiana.

²¹Tea waina e pesi tea veilala, e mari a e pei nasusueana aneana: Go tama ni tea veilala e da peani nalaelaeaana mau.

²²Nap̃op̃o laelaea sikai e pei tea maripauri wia: Ma naatana maworawora e pagarae navatu maga.

²³Tea sigisigileo e dape ruku pae narum̃a, Naga ega vuadoa napua maga ni navasap̃otaeana.

²⁴Namanumatuaana e doko kivea ki narae ni tea waina e peani namidoakiataeana: Ma namata ni tea manumatavusa ero doko namatap̃ago maga ni maramana.

²⁵Natu manumatavusa sikai e pei nasusueana ki tamana, Go e pei nakokonaana paki tea waina e pisola ki nia.

²⁶E da p̃ia mau naga tea marinaleoleanaana ega vei tea varatiana, Kite naga tea wia maga euga vei tea atugiana nalakena naleanaana adeada.

²⁷Tea waina e puasoki navasaana aneana, e peani naataeana: Go tea waina naatana e matemate, e pei tea ni namidoakiataeana.

²⁸Tea manumatavusa e pei tea midoakiana naga e manumatua ragi waina e punuta doko: Go tea waina e alap̃ono, e pei tea midoakiana naga e midoakiatae.