Read Nguna Togoa Etafe North NALULUAKIA MAGA 18 Bible Online

NALULUAKIA MAGA 18 - Nguna Togoa Etafe North bible

NALULUAKIA MAGA 18

¹Tea waina e dum̃ana mari masale ki nia, e laaga namasauana aneana, Go e midi dip̃a namanumatuaana wia mamau.

²Tea manumatavusa e da maro mau ki namidoakiataeana, Ma naga nap̃op̃ona ega tum̃ana pisei ki nia.

³Waina tea sigisigileo e umai, namidoaki‐p̃alo‐ki‐ana ma e umai, Go pilake nadododaoana, navasapinoaana e umai.

⁴Navasaana maga ni nawoka ni naatam̃oli eu dapala noai pakipua maga; Namata noai ni namanumatuaana e dapala noai sara.

⁵Naviragiraeana ki naatam̃oli ni nasigisigileoana e da p̃ia mau, Kite navuadoaana ki tea marinaleoleanaana m̃elu dua ki navasap̃otaeana.

⁶Nagole ni tea manumatavusa ero sili navululuana, Go nawokana e pioso raki navaratiana.

⁷Nawoka ni tea manumatavusa e pei namarisakiana aneana, Go nagolena ero pei vaivai ni naatana.

⁸Navasaana maga ki tea talakolako eu dapala navinaga lolo, Go eu siwo nap̃alau ni nap̃ele.

⁹Tea waina e mari daliali wosiana aneana, Nae ma e pei tai ni tea waina e pei tea marisaki.

¹⁰Nagisa ni Yehovah e pei nasum̃a vakilagi kasua: Tea leana e sava sili asa po pei tea mautiana.

¹¹Nasogolapaana ki tea sogolapa e pei natokoana kasua aneana, Go e dapala p̃aaka vakilagi aneana namidodoana.

¹²Pea ki namarisakiana, nap̃op̃o ni naatam̃oli e pakilagi, Go navei‐p̃op̃ovakitano‐ana e pea ki nadodomadaganiana.

¹³Tea waina e pitua ki navasadaraana ragi waina e ko da dogo e mau, Naveilalaana go namaliereana ero pei aneana.

¹⁴Naata ni naatam̃oli ega wo silae namanainaiana aneana; Ma naatana maworawora, sei e mariatae dapetape a?

¹⁵Nap̃op̃o ni tea midoakiatae e dape naataeana; Go nadaliga ni tea manumatua e laaga naataeana.

¹⁶Navituaana ki naatam̃oli e maneana mari namalopa, Po piragi a umai paki narae ni naatam̃oli vakilagi maga.

¹⁷Tea waina e do pululu navululuana aneana, e pea pei tea vunusiana dapala e leana; Ma tea ni m̃aladigi ki nia e umai po leousiusi a.

¹⁸Gole e marikotovi navululuana, Po dap̃otae namawota ni tea kasua maga.

¹⁹Namarimatuaana ni namaetoana ki tai sikai, E kasua liu namarimatuaana ni natokoana kasua sikai: Go navululuana maga wanogoe eu dakiusi nakau walagoto maga Ni nasum̃a kasua sikai.

²⁰Nap̃ele ni naatam̃oli ega wo puka ki nawa ni nawokana; Go ki navituaana ni nagolena, ega wo maro.

²¹Namateana go namauriana ero doko nakasuaana ni namena; Go tea maga waina eu dodomi a, euga wo gani nawa kakana.

²²Tea waina e pap̃ai nagoroi laki sikai, e pap̃ai naleo wia sikai, Go e dape nasaup̃iaana ki Yehovah.

²³Tea tika eu pavara: Ma tea sogolapa eu pasadara kasua.

²⁴Tea waina e mari navei‐tana‐ana eu laapa, e mari a e pei aneana namarisakiana: Ma tana sikai e doko, waina e dodomi p̃arua liu ki tai sikai.