Read Nguna Togoa Etafe North NALULUAKIA MAGA 19 Bible Online

NALULUAKIA MAGA 19 - Nguna Togoa Etafe North bible

NALULUAKIA MAGA 19

¹Tea tika waina e surata naleanaana aneana, E p̃ia liu tea waina e mari lolop̃ota nagolena, go e pei lala.

²Io, go waina naatana e dika naataeana, e da p̃ia mau; Go tea waina e lua natuana m̃araverave, e papele.

³Navei‐lala‐ana ki naatam̃oli e lim̃adoa napua aneana; Go nap̃op̃ona e sa dip̃a Yehovah.

⁴Nasogolapaana e mari navei‐tana‐ana laapa: Ma tea tika e pei tea mari p̃otaeana pa dua ki tana.

⁵Sogi ega wo da puoli mau ki tea noasokisoki sorosoro; Go tea waina e noa nasorosoroana maga, ega wo da dika ki navaratiana.

⁶Tea laapa euga wo datago paki tea saup̃ia: Go sara naata sikasikai e pei ta ni tea waina e pitua ki navituaana maga.

⁷Tea tika, tamataida maga mamau puti eu karaikita e: Go p̃arua liu tana ri maga eu pa dua ki nia pano paki uvea! E sava dausi ra ki navasaana maga, ma eu pano puoli.

⁸Tea waina e dape namanumatuaana, e dodomi aneana naatana: Tea waina e pavaigoro namidoakiataeana ega wo pap̃ai nawiaana.

⁹Sogi ega wo da puoli mau ki tea noasokisoki sorosoro; Go tea waina e noa nasorosoroana maga, ega wo mate puoli.

¹⁰E da pataka ni tea veilala naga ega suni sugoro ni nasamasamaana, po gani navinaga wia liu; Go p̃arua liu e da pataka ni tea suasua sikai naga ega maramara dap̃au tea maraki maga.

¹¹Namidoakip̃otaeana ki naatam̃oli e mari a e daliali namaetoana; Go e pei nasamasamaana aneana naga ega vakalau natapiriana.

¹²Namaritausuana ki nawota e dapala na‐uru‐ana ni laion; Ma nasaup̃iaana aneana e dapala nasovaki doko nam̃enau.

¹³Natu manumatavusa e pei narogokitesaana ki tamana: Go navululuana maga ki nagoroi laki eu duturu pitip̃atip̃a.

¹⁴Nasum̃a go nasogolapaana ero pei naveanipiolikiana pae tama maga, Ma nagoroi midoakiatae e pae Yehovah.

¹⁵Namamaleana e mari naratara‐ana; Go tea toko m̃oli ega wo pitolo.

¹⁶Tea waina e pavaigoro natip̃akiana, e pavaigoro naatana: Ma tea waina e midoaki p̃alo ki napua aneana maga, ega wo mate.

¹⁷Tea waina e dodomi tea tika, po dua e tea seakiana, e magi Yehovah mari a, Go natomariana wia aneana ega wo moro lagati pitua ki nia.

¹⁸P̃a varati pisei ki natum̃a, ragi waina naleogoroana e doko; Go p̃a ta lawo ki nap̃op̃om̃a namarisakiana aneana mau.

¹⁹Tea maritausu p̃arua ega wo sua navaratiana: Nalakena ku pe taulua e, ma e one ako one naga p̃a wo moro mari a.

²⁰Pa rogo namidoakip̃otaeana, po dape soki navasapiseikiana, Naga p̃a manumatua ragi edaku anigo.

²¹Namidoakiana sa maga ni nap̃op̃o ni naatam̃oli, eu laapa; Ma namidoakip̃otaeana ki Yehovah, tea wanogoe ega wo lawodu.

²²Namasauana ki naatam̃oli e pei totowo ni nadodomiana aneana: Go tea tika e p̃ia liu tea sorosoro.

²³Go tea matauki Yehovah e paraki namauriana: Go tea waina e peani a, ega wo maro doko; Go tea sa ega wo da pa parati ki nia mau.

²⁴Tea mamale e pupugi naruna siloa, Go ega wo da moro liliua ki nia paki nawokana mau.

²⁵Tea vasasaudoa e pe vei tea wokatiana, go tea manumatavusa ega wo peani namidoakip̃otaeana: Go tea waina e peani namidoakiataeana, e pe vei tea vasaparatikiana, go ega wo midoakiatae naataeana.

²⁶Tea waina e mari kasua ki tamana, po kopasi lua p̃ilana, E pei natu waina e mari namaliereana go waina e piragi navasapinoaana.

²⁷Natugu, ku pe makoto ki natakidorogoana ni navasapiseikiana, Ku pe sasap̃o pa dua ki navasaana maga ni naataeana.

²⁸Tea noasokisoki p̃alo, e mari saudoa ki navasap̃otaeana: Go nawoka ni tea sigisigileo e dinomi namarinaleotageleana.

²⁹Navasap̃otaeana maga eu magi tea vasasaudoa maga pei tea marim̃atakiana, Go nawokatiana maga raki nam̃adu ni tea manumatavusa maga.