Read Nguna Togoa Etafe North NALULUAKIA MAGA 2 Bible Online

NALULUAKIA MAGA 2 - Nguna Togoa Etafe North bible

NALULUAKIA MAGA 2

¹Natugu, ku pe tape navasaana aginau maga, Po daua ki natip̃akiana aginau maga sikoti ko;

²Naga p̃a taki nadaligam̃a paki namanumatuaana, Po pitua ki nap̃op̃om̃a paki namidoakiataeana;

³Io, ku pe vioso raki naataeana, Po pitua ki nadaleom̃a raki namidoakiataeana:

⁴Ku pe laaga asa dapala silver, Po leo laaga asa dapala naleo wia tasurukiana;

⁵Ragi wanogoe ku pe wo midoakiatae namatauki‐Yehovah‐ana, Po pap̃ai naatae‐Sup̃e‐ana.

⁶Nalakena Yehovah e do pitua ki namanumatuaana; Naataeana go namidoakiataeana ero m̃elu dua ki nawokana:

⁷E do magi tea leana maga daua ki namanumatuaana wia, Emagi tea maga waina eu do surata pae nawialuaana pei nakokoro sikai;

⁸Naga ega leo parati ki napua maga ni navasap̃otaeana, Go ega wo pavaigoro napua ki tea dodomi‐dodomiana aneana maga.

⁹Ragi wanogoe p̃a wo midoakiatae namarinaleoleanaana, Go navasap̃otaeana, go naleanaana, go sara napua wia.

¹⁰Nalakena namanumatuaana ega wo sili nap̃op̃om̃a, Go naataeana ega wo pei tea masauniana paki naatam̃a;

¹¹Namidoakip̃otaeana ega wo pavaigoro ko, Namidoakiataeana ega wo leo parati ki‐go:

¹²Naga ega vualua ko pa dua ki napua ki tea sa, Pa dua ki naatam̃oli maga waina eu do pasa namarisoreana maga;

¹³Waina eu doropusi napua maga ni naleanaana, Naga euga surata napua maga ni namaligo;

¹⁴Waina eu laelaea mari tea sa, go eu laelaea sokamidi namarisoreana ki tea sa;

¹⁵Waina eu dagele napua adeada maga, Po do mari lolop̃ota napua adeada maga:

¹⁶Naga ega vualua ko pa dua ki nagoroi p̃ota, Pa dua ki nagoroi p̃ota waina e do mari navasaana aneana maga eu m̃om̃oa;

¹⁷Waina e doropusi tana ri ragi waina e pei naatara, Go e malio ki navasasokiana ki Sup̃e aneana:

¹⁸Nalakena nasum̃a aneana e kere paki namateana, Go napua aneana maga eu siwo paki naatemate maga:

¹⁹Te naata seara waina eu pa punusi a, Eu da moro liliu umai mau, Go eu da pa parati ki napua maga Ni namauriana mau:

²⁰Naga p̃a surata pae napua ki naatam̃oli wia maga, Po pavaigoro napua maga ki tea leana maga.

²¹Nalakena tea leana maga euga wo doko navanua doko, Go tea wia lua maga euga wo doko mau doko asa.

²²Ma tea sigisigileo maga euga wo pei tea taeluaana m̃elu dua ki navanua, Go tea maga waina eu mari malauweluki euga wo pei tea vakudakatiana m̃elu dua ki nia.