Read Nguna Togoa Etafe North NALULUAKIA MAGA 20 Bible Online

NALULUAKIA MAGA 20 - Nguna Togoa Etafe North bible

NALULUAKIA MAGA 20

¹Waine e pei tea mari saudoa sikai, namunuana kasua e pei tea mari p̃aragoto sikai; Go tea waina e darataara asa, e da manumatua mau.

²Namatauki‐nawota‐ana e dapala na‐uru‐ana ni laion: Tea waina e pakadali a po mari namaetoana aneana e pavaga, e dum̃ana mari sa ki namauriana aneana.

³E pei nadodomadaganiana ki naatam̃oli naga ega madu uvea ki navileana: Ma tea manumatavusa maga mamau puti euga wo pile.

⁴Tea mamale e da kili natano nalo ni namaladiana; Nalakena tea wanogoe ega wo datago ragi ni natagaukotoviana, go ega wo da peani te navatuna mau.

⁵Namidoakip̃otaeana nap̃op̃o ni naatam̃oli e dakiusi noai vakipua; Ma tea ni namidoakiataeana ega wo pualua e.

⁶Naatam̃oli laapa euga wo sikasikai sarasara ra dogorogo ki aneana nadodomiana: Ma sei e mariatae pap̃ai tea veilomau?

⁷Tea leana waina e surata naleanaana aneana, Natuna maga waina eu edakugoro e, eu maropa.

⁸Nawota waina e dasake malo tasake ni navasap̃otaeana, E daperavera ki puti tea sa, ki namatana maga.

⁹Sei e mariatae noa, A po mari nap̃op̃ogu e dautau, A dautau m̃elu dua ki namarinaleosaana aginau?

¹⁰Vatu rowogi visarasara maga, go narowogiana visarasara maga, Ero pataka sikai pei tea mamaragokiana ki Yehovah.

¹¹Io, piakiki sikai e dum̃ana mari a e pei tea ataeana ki Natomariana aneana maga, Nawosiana aneana e pe tautau, kite e pe leana.

¹²Nadaliga dakidorogo, go namata leopunusi, nara ma Yehovah e mari sokota ki da.

¹³Pa ta dodomi namaturuana, mase ku pe vei tea tika; Pa wolagati namatam̃a, go p̃a wo puka ki navinaga.

¹⁴Tea vakokoto e naga, E da pei te navatuna, e da pei te navatuna: Ma ragi waina e pano napua aneana, e pasa pakavakae.

¹⁵Kold e doko, go nalapalapaana ni rubi maga: Ma nagole ni naataeana eu pei naloriki wia masauniana.

¹⁶Pa tape sugoro aneana waina e magi tea p̃ota pei tea tu oli; Go p̃a vuati a ega vei nanadisokiana waina e magi tea p̃ota maga pei natuoliana.

¹⁷Navinaga ni nasorosoroana e gagadi paki naatam̃oli; Ma edaku ki nia nawokana ega wo pura ki nakirikiri.

¹⁸Sara namidoakisokiana eu pei tea lawosokiana puti pae navusum̃akiana: Go pae namarakiana manumatua, p̃a wo p̃owolau ki navakalo.

¹⁹Tea waina e do surata pasara pasa pinoa, e do noa pakasa ki p̃aia maga: Nalakena tea wanogoe p̃a ta pasa piriviri paki tea magamaaga p̃alo mau.

²⁰Tea waina e pasa sa ki tamana kite p̃ilana, Nasulu aneana ega wo pei tea vunueana namaligo ni namaligoligo.

²¹Tea veanipiolikiana e mariatae pei tea tapeana m̃araverave ragi vea; Ma ragi edaku kakana ega wo da pei tea vasap̃iakiana mau.

²²Pa ta noa, Aga wo lagati dua tea sa: Pa leogoro Yehovah, go nae ega wo mautipauri ko.

²³Vatu rowogi visarasara maga eu pei tea mamaragokiana ki Yehovah; Go lasa totowo maga ni namarisoreana eu da p̃ia mau.

²⁴Navanoana maga ki naatam̃oli eu pei tea ki Yehovah; Go tea wanogoe, dapale sava ega midoaki atae napua aneana?

²⁵E pei vaivai sikai paki naatam̃oli waina ega vasa p̃aragoto, Po naga, E pei tapu; go edaku ki nasaiana maga, ega vusuusu.

²⁶Nawota manumatua e do nive lua tea sigisigileo, Go e do piragi tea taliepu ni tea wokalesue, e nadi soki ra.

²⁷Naata ni naatam̃oli e pei nasulu ki Yehovah, Doko do leousiusi nap̃alau ni nap̃ele.

²⁸Nadodomiana go nalomauana ero pavaigoro nawota: Go malo tasake aneana e pei tea silaeana ki nadodomiana.

²⁹Nasamasamaana ki natureai maga e pei nakasuaana adeada: Go narekeikiana ki mariki matua maga e pei navei‐p̃au‐kapuaraana.

³⁰Wotu maga ni navaratiana eu do sarue lua tea sa: Go nawokatiana maga eu do paraki nap̃alau ni nap̃ele.