Read Nguna Togoa Etafe North NALULUAKIA MAGA 21 Bible Online

NALULUAKIA MAGA 21 - Nguna Togoa Etafe North bible

NALULUAKIA MAGA 21

¹Nap̃op̃o ni nawota e doko nam̃elearu ni Yehovah dapala noai sara maga: E doa e paki te tokora ni namasauana aneana.

²Sara napua ki naatam̃oli e leana aneana namatana: Ma Yehovah e do dowogi nap̃op̃o maga.

³Namariana ni naleanaana go navasap̃otaeana, E p̃ia liu naviriana namata ni Yehovah.

⁴Naleolagiana, go nap̃op̃o vakilagi, io go nasulu ki tea sigisigileo, E pei namarinaleosaana.

⁵Namidoakiana maga ki tea m̃arekareka eu paraki nalapalapaana: Ma sara naata waina eu mari m̃araverave m̃oli, eu paraki natikaana mau.

⁶Nataluaana ni naloriki wia maga pae namena sorosoro, E pei namavu waina e pei tea salesaleakiana: Tea maga waina eu laaga ara, eu laaga namateana.

⁷Namaripavakotoana ki tea sigisigileo ega wo mari puoli ki da; Nalakena eu karaikita naga euga mari navasap̃otaeana.

⁸Napua ki tea waina e peani sogi warua, e dagelegele pa: Ma nalo ni tea p̃op̃o dautau, nawosiana aneana e leana.

⁹Naweluki ni nam̃asua ni nasum̃a, e p̃ia liu nasum̃a welewelea Sikoti nagoroi masau navululuana.

¹⁰Naata ni tea sigisigileo e masau tea sa: Tea ni m̃aladigi ki nia e da pap̃ai nasaup̃iaana mau namatana.

¹¹Ragi waina tea vasa saudoa e pei tea varatiana, Tea manumatavusa e pei tea mariana e manumatua: Go ragi waina tea manumatua e pei tea vasapiseikiana, E dalua naataeana.

¹²Tea leana e midoakiusiusi nasum̃a ni tea sigisigileo; Naga tea sigisigileo maga eu pei tea tosivakiana paki namarisakiana adeada.

¹³Te naata waina e p̃onoti nadaligana maga dip̃a naviosoana ki tea tika, Nae ma ega wo pioso, ma ega wo da pei tea rogoana mau.

¹⁴Navituaana dasurukiana e mari namaetoana e dam̃ate. Go nadodomiana doko narum̃a e mari namaritausuana e makoto.

¹⁵E pei nalaelaeaana ki tea mari naleoleanaana naga ega mari navasap̃otaeana; Ma e pei namarisakiana paki tea mari namarinaleotageleana.

¹⁶Tea waina e sasap̃o m̃elu dua ki napua ni namidoakiataeana, Ega wo one nasaisaiana ki tea mate.

¹⁷Tea waina e dodomi namaropaana, ega wo pei tea tika: Tea waina e masau p̃arua ki waine go naroro, ega ta pei sogolapa mau.

¹⁸Tea sigisigileo e magi tea mari naleoleanaana pei naulu ni natap̃augoroana; Go tea mari malauweluki e doko oli tea leana.

¹⁹Namauriana ki tea waina e doko navanua ni maso maladi doko, E p̃ia liu ki tea waina e doko sikoti nagoroi vululu, go p̃op̃o sa.

²⁰Naleo tauakiana wia, go naroro, eu doko nasum̃a tokoana ki tea manumatua; Ma tea manumatavusa e do dinomi a.

²¹Tea waina e dausi namarinaleoleanaana go nadodomiana, E pap̃ai namauriana, go namarinaleoleanaana, go nadodomadaganiana.

²²Tea manumatua e pagi kalau natokoana ki tea kasua maga, Go e piragi siwo nakasuaana ni navavatuana kakana.

²³Tea waina e pavaigoro nawokana go namenana, E pavaigoro naatana pa dua ki narogokitesaana maga.

²⁴Tea p̃op̃o vakilagi go leolagi, tea vasa saudoa e pei nagisana, E do mari pae naleomadagaana ni nap̃op̃ovakilagiana.

²⁵Namasauana ki tea mamale e maripunue a; Nalakena nam̃elearuna maga ero karai p̃osiwosi.

²⁶Tea sikai e doko waina e matam̃agura dape pavakoto naaleatia mamau: Ma tea marinaleoleanaana e do pitua, po da mauti mau.

²⁷Naviriana ki tea sigisigileo e pei namamaragokiana: Go p̃arua liu, ragi waina e dape a umai pilake namidodoana sigisigileo!

²⁸Tea noasokisoki sorosoro ega wo mate puoli: Ma naata waina e do dogo, ega wo pasa, go tea p̃ota ega wo da dugoro e mau.

²⁹Tea sigisigileo e dum̃ana mari naraena e kasua: Ma tea leana, nae e dum̃ana midoaki m̃ata ki napua aneana maga.

³⁰Te namanumatuaana, kite namidoakiataeana, Kite namidoakip̃otaeana, e da doko mau dip̃a Yehovah.

³¹Horse e pei tea marim̃atakiana raki naaleatia ni navivimariana: Ma namarimatuaana e pei tea ki Yehovah.