Read Nguna Togoa Etafe North NALULUAKIA MAGA 22 Bible Online

NALULUAKIA MAGA 22 - Nguna Togoa Etafe North bible

NALULUAKIA MAGA 22

¹Nagisa wia e p̃ia pa liu nasogolapaana warua, Go nasaup̃iaana dodomi e p̃ia liu silver go kold.

²Tea sogolapa go tea tika eu mamau saisai: Yehovah e pei Tea Tawona ki puti ra.

³Tea midoakiatae e punusi tea sa, po dum̃ana dasuru ki nia: Ma tea manumatavusa e do liu pano, po sua narogokitesaana.

⁴Nasogolapaana, go nadodomadaganiana, go namauriana, Eu pei nalagati pituakiana ki navakitanoana go namataukiana ki Yehovah

⁵Tea makalikali go vaivai maga eu doko napua ki tea mari malauweluki: Tea waina e pavaigoro naatana ega madu uvea ki da.

⁶Pa vasapisei ki piakiki napua waina ega vae asa, Go ragi waina ega vei tea matua, ega wo da dawasi m̃elu dua ki nia mau.

⁷Tea sogolapa e maramara dap̃au tea tika, Go tea waina e do sea, e pei tea suasua ki tea waina e pitua ki tea seakiana.

⁸Tea waina e sapura ki namarinaleotageleana, ega wo dagaukotovi nariesokiana: Go nakau varati ni namaritausuana aneana ega wo puoli.

⁹Tea waina e peani namata leana, ega wo maropa; Nalakena e pitua ki navinaga aneana dua tea tika asa.

¹⁰Pa nadi ki lua tea vasa saudoa, go navululuana ega wo dave pano; Io, navileana go nadododaoana euga wo makoto.

¹¹Tea waina e dodomi p̃op̃o tautau, Nalakena nasaup̃iaana ni nagolena, nawota ega wo pei tana ri.

¹²Namata ni Yehovah ero pavaigoro tea waina e peani naataeana, Ma e dap̃olosiwo ki navasaana maga ki tea mari malauweluki.

¹³Tea mamale e naga, Laion e doko etaku: Aga wo pei tea maripunueana napua lapa maga.

¹⁴Nawoka ni nagoroi p̃ota e pei m̃oru vakipua: Tea waina e pei tea mamaragokiana ki Yehovah ega wo dowo paki asa.

¹⁵Navei‐lala‐ana e pei tea soliparatikiana nap̃op̃o ni piakiki; Ma nakau varati ni natapavanauana ega wo kopasi lua e paki uvea ki nia.

¹⁶Tea waina e diesoki tea tika naga nataluaana aneana ega risurisu, Go tea waina e pitua dua tea sogolapa, ega wo paraki natikaana.

¹⁷Pa taki nadaligam̃a, po dogo navasaana maga ki tea manumatua, Po pitua ki nap̃op̃om̃a paki naataeana aginau.

¹⁸Nalakena e pei tea masauniana pa, ku pe vavaigoro ra doko ako, Go ero dua pe vei tea lawokilaketokoana nagolem̃a.

¹⁹Naga navavatuana anigo ega toko Yehovah, A po mari ra eu pei tea ataeana paki go naaleatia waia, io lomau, paki go.

²⁰A po da midiri paki go naleo wia lua maga ni Namidoakip̃otaeana go naataeana, kite?

²¹Naga p̃a wo atae naveilomauana ni navasaana maga ni nalomauana, Naga p̃a tape navasaana maga ni nalomauana liliu paki tea maga waina eu do dip̃aki‐go, kite?

²²Pa ta dapepavakoto naleo ki tea tika mau, nalakena e pei tea tika, Go p̃a ta diesoki tea rogokitesa doko namata‐pua:

²³Nalakena Yehovah ega wo pululu navululuana adeada, Go ega wo mari sa ki namauriana ki tea maga waina eu mari sa ki da.

²⁴P̃a ta mari navei‐tana‐ana mau sikoti tea maeto p̃alo; Go p̃a ta sikoti tea maritausu pano mau:

²⁵Mase ku pe rogoatae napua aneana maga, Go ku pe veani vaivai paki naatam̃a.

²⁶Pa ta pei sikai ni tea maga waina eu du oli tea p̃ota, Kite sikai ni tea maga waina eu pei tea tu oli maga nalo ni napuku:

²⁷Ku pe ta peani te navatuna waina ku pe taulua napuku asa, Ekasana ega wo dape lua nawewele anigo m̃elu dua ki‐go?

²⁸Pa ta disua ki kokoi tuai mau, Waina tamam̃a maga eu lawo ki nia.

²⁹Ku punusi naata sikai waina e m̃arekareka nawosiana aneana kite? Nae ega wo lawodu narae ni nawota maga; Ega wo da lawodu narae ni naatam̃oli p̃alo mau.