Read Nguna Togoa Etafe North NALULUAKIA MAGA 23 Bible Online

NALULUAKIA MAGA 23 - Nguna Togoa Etafe North bible

NALULUAKIA MAGA 23

¹Ragi waina ku dasake sikoti tea maraki naga p̃a kanikani, Pa midoakiusiusi m̃ata ki tea waina e doko naraem̃a;

²Go ku pe vei tea vitolo, Pa toropusi masimasi namanum̃a.

³Pa ta masau p̃arua ki navinaga lolo aneana; Nalakena e pei navinaga vilasurue.

⁴Pa ta p̃osiwosi mawosa naga p̃a vei sogolapa; Pae namanumatuaana anigo, p̃a makoto ki nia.

⁵Pa wo lawo ki namatam̃a tea waina e da doko mau kite? Nalakena nasogolapaana maga eu dum̃ada madeada mari nalivaru maga, Dakiusi ikila waina e diri paki nakoroatelagi.

⁶Pa ta gani navinaga mau ki tea waina e matasoki namatana, Go p̃a ta masau navinaga lolo aneana:

⁷Nalakena dapala waina e dum̃ana midoakiusiusi nap̃alauna, nae e dapala nogoe: Pa kanikani, po munu, nae e noa ki‐go asa; ma nap̃op̃ona e da puluti ko mau.

⁸Matele waina ku po gani a, p̃a wo lua ki nia, Go p̃a wo dape puoli ki navasaana gagadi anigo maga.

⁹Pa ta pasa mau narae ni tea manumatavusa; Nalakena ega wo midoaki p̃alo ki namanumatuaana ni navasaana anigo.

¹⁰Pa ta disua ki kokoi tuai mau; Go p̃a ta sili vanua maga ki tama tika:

¹¹Nalakena tea taulua ra e kasua; Ega wo pululu navululuana adeada dip̃a ko.

¹²Pa vitua ki nap̃op̃om̃a paki navasapiseikiana, Go nadaligam̃a paki navasaana ni naataeana.

¹³Pa ta mauti piakiki ki natapavanauana: Nalakena ku pe wokati a ki nakau varati, e pe wo da mate mau.

¹⁴P̃a wo p̃okati a ki nakau varati, Go p̃a wo daulua naatana m̃elu dua ki Sheol.

¹⁵Natugu, nap̃op̃om̃a e pe manumatua, Nap̃op̃ogu, io, tea aginau, ega wo laelaea:

¹⁶Io, nap̃elekevatugu euga wo laelaea, Ragi waina nagolem̃a eroga vasa navasaana leana.

¹⁷Nap̃op̃om̃a ega ta doitoi tea marinaleosa maga: Ma p̃a toko namatauki‐Yehovahana pitip̃atip̃a:

¹⁸Nalakena lomau na‐lagati‐pituaki‐ana e doko; Go naleogoroana anigo ega wo da pei tea takotoviana mau.

¹⁹Pa rogo, natugu, go p̃a manumatua, Po damaraki nap̃op̃om̃a napua leana.

²⁰P̃a ta sikoti tea munu waine; Go tea tuatua liu ni nap̃okasi:

²¹Nalakena tea matamaloku go tea tuatua liu euga wo pei tea tika: Go nadeaana ega wo sugoro naatam̃oli ki tea makaaka.

²²Pa rogo parati ki tamam̃a waina e pesi ko, Go p̃a ta midoaki p̃alo ki pilam̃a ragi waina e pei vitariki matua,

²³Pa vakotovi nalomauana, po da sori a mau: Go namanumatuaana, go navasapiseikiana, go namidoakiataeana.

²⁴Tama ni tea leana ega wo laelaea p̃arua: Go tea waina e pesi piakiki manumatua ega wo peani nalaelaeaana asa.

²⁵Tamam̃a go pilam̃a eroga maro, Go tea waina e pisola kigo, ega laelaea.

²⁶Natugu, p̃a tua au nap̃op̃om̃a, Go namatam̃a eroga maro napua aginau maga.

²⁷Nalakena nagoroi masausara e pei m̃orutano; Go nagoroi p̃ota e pei nam̃adau.

²⁸Io, e kusugoro dakiusi tea tapepavakoto, Go e mari tea malauweluki eu disu po laapa.

²⁹Sei e peani narogokitesaana? Sei e peani nasusueana? Sei e peani navululuana? Sei e peani nataururuana? Sei e peani wotu, go nalakena e dika? Sei e peani namata miala?

³⁰Tea maga waina eu doko parau po munu p̃arua ki waine; Go tea maga waina eu laaga waine sarisari.

³¹Pa ta leopunusi waine ragi waina e miala, Ragi waina e pei tea leom̃atakiana doko lasa, Ragi waina e pei tea tirom̃atakiana:

³²Ragi edaku e pivikati dapala m̃aata, Go e pivitip̃a dapala adder.

³³Namatam̃a eroga wo punusi naleo panop̃ota maga, Go nap̃op̃om̃a ega wo pitua ki naleo malauweluki maga.

³⁴Io, p̃a wo dakiusi tea waina e one natasi vakipua, Kite dakiusi tea waina e one nam̃asua ni natira.

³⁵Eu parati au, p̃a wo noa e, go a da pei tea marisakiana mau: Eu p̃okati au, go a da dogo e mau: Seve ragi aga wo darapa? Aga wo moro laaga asa.