Read Nguna Togoa Etafe North NALULUAKIA MAGA 25 Bible Online

NALULUAKIA MAGA 25 - Nguna Togoa Etafe North bible

NALULUAKIA MAGA 25

¹Tea maga waia ma, eu pei naluluakia maga ki Solomon, Waina naatam̃oli maga ki Hesekiah, nawota ni Yudah, eu midiri ra.

²E pei nasamasamaana ki Sup̃e naga ega tap̃augoro navatuna sikai: Ma e pei nasamasamaana ki nawota maga naga euga laaga parati ki navatuna sikai.

³Navakilagiana ni nakoroatelagi, go navakipuaana ni maramana, Go nap̃op̃o ni nawota maga eu marisap̃o pei tea leousiusiana.

⁴Pa tape lua nasam̃a pa dua ki silver, Go lasa sikai e doko raki tea mataisau ni silver:

⁵Pa tape lua tea sigisigileo m̃elu dua ki narae ni nawota, Go malo tasake aneana ega wo pei tea lawosokiana namarinaleoleanaana.

⁶Pa ta pei tea p̃op̃ovakilagi narae ni nawota, Go p̃a ta lawodu tokora ki tea vakilagi maga mau.

⁷Nalakena e p̃ia liu naga ega vei tea noaana paki‐go, Pa sake umai paki nea; E sa liu naga p̃a wo pei tea toropusiana etano liu Narae ni tea maraki, waina namatam̃a ero punusi a.

⁸Pa ta m̃araverave dave naga p̃a wo pilele, Ku pe ta atae tea waina p̃a wo mari a edaku kakana, Ragi waina tea ni m̃aladigi kigo e pe mari ko ku maliere.

⁹P̃a vululu navululuana anigo paki tea ni m̃aladigi ki‐go, Nae e sikina, go p̃a ta noasai p̃aia ki tea p̃ota mau:

¹⁰Mase tea waina e dogo e, e pe wo pasa pinoa ki‐go, Go navasapinoa‐ki‐go‐ana e pe ta makoto mau.

¹¹Navasaana leana ragi wia kakana e dakiusi nawa nakavika ni kold, Waina eu pei tea vaiana paki nala maga ni silver.

¹²Dapala tea vakadaliga ni kold, go naleo ni narekeiana ni kold wia. Tea vasaparatiki manumatua e dapala nogoe paki nadaliga rogoparatiki.

¹³Dapala namaladiana ni sno ragi ni natagaukotoviana, Tea tautauana lomau e dapala nogoe paki tea maga waina eu dip̃aki nia; Nalakena e pakamaromaro ki naata ni nawota aneana maga.

¹⁴Dapala napopouru go nalagi masale ki usa, Tea waina e sorosoro po dum̃ana pasapakavakae nalo Ni navituaana aneana maga, e dapala nogoe.

¹⁵Ki naveimaritasoki‐parauana, tea maraki e pei tea mariana e dam̃ate, Go namena matemate e p̃orikotovi navatu.

¹⁶Ku po pap̃ai honi kite? P̃a kani tea vatakam̃a; Mase ku pe vuka p̃arua ki nia, po lua ki nia.

¹⁷Natuam̃a ega vaka visa maau paki nasum̃a ki tea ni m̃aladigi ki‐go; Mase e pe karai punusi ko, po karaikita ko.

¹⁸Tea waina e noasokisoki sorosoro dip̃a tea ni m̃aladigi ki nia, E pei naap̃e, go lova, go natip̃a makali.

¹⁹Navavatuana ni tea mari malauweluki ragi ni narogokitesaana, E dakiusi napati makoto, go natua lawopele.

²⁰Dapala tea waina e sawolua sugoro ragi ni namaladiana, Go dapala waine kokona doko wotu, Tea lega nalegaana paki tea p̃op̃o madaga, e dapala nogoe.

²¹Tea kokona ki‐go e pe vitolo, p̃a tua e navinaga ega kanikani; Go e pe madou, p̃a tua e noai ega munu:

²²Nalakena p̃a wo daua ki nam̃elevara ni nakapu nap̃auna, Go Yehovah ega wo lagati dua ko.

²³Nalagi tokolau lapa e piragi usa umai: Go dapala nogoe namena pinoa e piragi namaetoana umai.

²⁴Naweluki ni nam̃asua ni nasum̃a, e p̃ia liu nasum̃a welewelea Sikoti nagoroi masau navululuana.

²⁵Dapala noai maladi paki tea madou, Narogorogoana wia pae navanua ni uvea umai, e dapala nogoe.

²⁶Dapala namata noai loaloa, go namata noai marisakiana, Tea leana waina e dogo parati ki tea sigisigileo, e dapala nogoe.

²⁷E da p̃ia mau naga honi ega vei tea kani‐p̃arua‐ki‐ana: Go e da pei nasamasamaana mau naga naatam̃oli maga, Euga tum̃ada laaga parati ki adeada nasamasamaana.

²⁸Tea waina e da dap̃augoro naatana mau, E dakiusi natokoana marip̃oraeana waina e dika ki p̃aaka.