Read Nguna Togoa Etafe North NALULUAKIA MAGA 26 Bible Online

NALULUAKIA MAGA 26 - Nguna Togoa Etafe North bible

NALULUAKIA MAGA 26

¹Dapala sno ragi ni sui, go usa ragi ni natagaukotoviana, Dapala nogoe nadodomadaganiana e da pataka ni tea manumatavusa.

²Dapala sparro waina e do pasara, go dapala manu kapataika waina e do diri, Dapala nogoe navasasakiana, nalakena e dika, e da lawo mau.

³Natali varati raki horse, tea p̃auasi raki ass, Go nakau varati raki nam̃adu ni tea veilala.

⁴Pa ta pasadara tea veilala dakiusi navei‐lala‐ana aneana, Mase nigo ma ku pe wo dakiusi a.

⁵Pa vasadara tea veilala dakiusi navei‐lala‐ana aneana, Mase e pe wo manumatua aneana namatana.

⁶Tea waina e dip̃aki navitaua pae nam̃elearu ni tea veilala, E dum̃ana daekotovi natuana, po do munu narogokitesaana.

⁷Natua ni tea vei pito ero sarumate dau: Naluluakia e dapala nogoe nawoka ni tea veilala.

⁸Dapala nala ni vatu wia lua maga m̃aleoputo ni nap̃akou, Tea waina e pitua ki nadodomadaganiana paki tea veilala, e dapala nogoe.

⁹Dapala natip̃a waina e puri nam̃elearu ni tea matamaloku, Naluluakia e dapala nogoe nawoka ni tea veilala.

¹⁰Dapala tea tape naasu waina e p̃okawokati tea mamau puti, Tea waina e pasadapui tea veilala, go tea waina e pasadapui Tea maga waina eu do liu pano, e dapala nogoe.

¹¹Dapala koria waina e liliu raki tea waina e lua ki nia, Tea veilala waina e mari naveilala‐ana aneana paka laapa, e dapala nogoe.

¹²Ku punusi naatam̃oli waina e manumatua aneana namatana kite? Naleogoroana ki tea veilala e p̃arua liu tea aneana.

¹³Tea mamale e naga, Laion sikai e doko napua; Laion sikai e doko napua lapa maga.

¹⁴Dapala waina namata e dum̃ana doa e ki tea vuasoki kakana, Dapala nogoe tea mamale e dum̃ana doa e nawewele aneana.

¹⁵Tea mamale e pupugi naruna siloa; E dodosua naga ega moro liliua ki nia paki nawokana.

¹⁶Tea mamale e manumatua aneana namatana liu naatam̃oli larua Waina eu mariatae pitua ki navasakorokoroana.

¹⁷Tea waina e do liu pano, po dum̃ana mari sa ki nia ki navileana waina e da pei aneana, E dakiusi tea waina e puasoki nadaliga ni koria.

¹⁸Dakiusi tea doropa waina e nadi ki naseati maga, Go natip̃a maga, go namateana;

¹⁹Tea waina e pilasurue tea ni m̃aladigi ki nia, po naga, A da mari p̃arop̃aro kite? Nae e dapala nogoe.

²⁰Waina nakau e dika, nakapu e mate: Go waina tea talakolako e dika, navululuana e makoto.

²¹Dapala nam̃elevara paki nakapu vavaga, go nakapu paki tea vavaga; Dapala nogoe naatam̃oli vululu e do mari navululuana e pavaga.

²²Navasaana maga ki tea talakolako eu dapala navinaga lolo, Go eu siwo nap̃alau ni nap̃ele.

²³Nagole vasa m̃osim̃osi, go nap̃op̃o sigisigileo, Ero dakiusi lasa ni naruku waina e pei tea vulugoroana ki nasam̃a ni silver.

²⁴Tea waina e do pivilosi, e do sorosoro ki nagolena, Ma e do daua ki namarisoreana nap̃alauna:

²⁵Ragi waina e pasa m̃om̃oa, p̃a ta saralomau asa mau; Nalakena namamaragokiana larua eu doko nap̃op̃ona:

²⁶Navilosiana aneana e pe tum̃ana kovagoro e ki nasorosoroana, Ma nasigisigileoana aneana ega wo doko lina narae ni nasaisaiana.

²⁷Tea waina e kili m̃orutano, ega wo diro asa: Go tea waina e malulua ki vatu, ega malulu liliu paki nia.

²⁸Namena sorosoro e pilosi tea maga waina e atugi ra; Go nawoka m̃om̃oa e do mari namarisakiana.