Read Nguna Togoa Etafe North NALULUAKIA MAGA 27 Bible Online

NALULUAKIA MAGA 27 - Nguna Togoa Etafe North bible

NALULUAKIA MAGA 27

¹P̃a ta dum̃am̃a pasa pakavakae mau nalo ni matamai; Nalakena ku da atae mau tea waina ega vakilina naaleatia.

²Tea p̃ota ega samasamani ko, ma ega ta pei anigo nawokam̃a; Tea ni namatarau p̃ota, ma ega ta pei anigo nagolem̃a.

³Vatu e madaga, go naworaone e madaga; Ma namaetoana ki tea veilala e madaga liu sokota ki da.

⁴Namaritausuana e dodotika, go namaetoana e dietie; Ma sei e mariatae lawo dugoro natotowokasuaana?

⁵Navasakasuakiana tokolina e p̃ia liu nadodomiana tasurukiana.

⁶Navasap̃okatiana ki tea dodomi e pei lomau: Ma navasam̃atakiana ki tea kokona eu laapa.

⁷Naata waina e puka, e karaikita nasum̃a ni honi: Ma naata waina e pitolo, naleo kokona e gagadi paki nia.

⁸Dapala manu waina e m̃elu dua ki vetena pano, Naata waina e m̃elu dua ki naliana pano, e dapala nogoe.

⁹Naroro lolo go tea ni nap̃o wia ero mari nap̃op̃o e laelaea: Go nalolomanaana ni navasaana ki tana sikai, e dapala nogoe.

¹⁰Anigo tam̃a ri, go tamam̃a tana ri, p̃a ta doropusi ra mau; Go p̃a ta paki nasum̃a ki taim̃a naaleatia ni namarisakiana anigo: Tea ni m̃aladigi sikai waina e doko m̃aladigi, E p̃ia liu tai sikai waina e doko uvea.

¹¹Natugu, p̃a manumatua, po mari nap̃op̃ogu ega laelaea, Naga aga vasadara tea waina e pasapinoa ki nau.

¹²Tea midoakiatae e punusi tea sa, po dum̃ana dasuru ki nia: Ma tea manumatavusa e do liu pano, po sua narogokitesaana.

¹³Pa tape sugoro aneana waina e magi tea p̃ota pei tea tu oli; Go p̃a vuati a ega vei nanadisokiana waina e magi nagoroi p̃ota pei natuoliana.

¹⁴Tea waina e pasa dodomi tana ki nadaleo kasua sikai, Doko do duleana malip̃ogi loaloa, ega wo pei tea midoakiana naga ega vei tea vasasakiana.

¹⁵Duturu waina e do lawolawo pitip̃atip̃a naaleatia ni usa, Go nagoroi vululu ero pataka sikai:

¹⁶Tea waina e masau dip̃agoro e, e dip̃agoro nalagi, Go nam̃elearuna ni matua e m̃arasarasa ki naroro.

¹⁷Airon e pakali airon; Go tana e pakali narae ni tana ri.

¹⁸Tea waina e pavaigoro napuliva, ega wo gani nawana; Go tea waina e leogoro nawota aneana, ega wo sua nasamasamaniana.

¹⁹Dapala waina noai e pisei ki narae paki narae, Nap̃op̃o naatam̃oli paki naatam̃oli, e dapala nogoe.

²⁰Sheol go Abaddon ero ko da pura mau; Go namata ni naatam̃oli eu ko da pura mau.

²¹Lasa veniana e pei tea ki silver, go upu e pei tea ki kold, Go naatam̃oli e pei tea maridogoana ki navakavakae‐a‐ana aneana.

²²Ku pe lawo p̃oroworosi tea manumatavusa ki tea lawolawo Doko siloa tokolosake, pilake korn p̃oroworosiana, Ma naveilalaana aneana ega wo da m̃elu dua ki nia pano mau.

²³Pa mari m̃arekareka po atae m̃ata ki navata ni shiip go ni naninani anigo maga eu dapale sava, Go p̃a leoparati ki m̃ata ki navata ni kau anigo maga:

²⁴Nalakena nasogolapaana e da doko mau doko mau; Go vauvau e do du pa pa paki tagona go tagona kite?

²⁵Nam̃enau kokolo e pei tea tapeana pano, go nam̃enau vau e moro pisou, Go nataputea ni tava warua maga eu pei tea lolovaekiana.

²⁶Sugoro anigo ega vae shiip natuna maga, Go naninani eu pei naulu ni vanua:

²⁷Go milk ni naninani ega vei navinaga anigo, Patakam̃a go pataka ni tea ni nasum̃a anigo; Go nasilaeana ni namauriana ki tea suasua nagoroi anigo maga.