Read Nguna Togoa Etafe North NALULUAKIA MAGA 28 Bible Online

NALULUAKIA MAGA 28 - Nguna Togoa Etafe North bible

NALULUAKIA MAGA 28

¹Tea sigisigileo maga eu do sava pano ragi waina te naata e da kopasi ra mau: Ma tea leana eu piviari dapala laion.

²Nalakena natapiriana ni navanua, tea maraki kakana eu laapa: Ma pae tea ni namidoakiataeana go naataeana, ega wo da pei tea varivarikiana mau.

³Tea rogokitesa waina e diesoki tea tika, E dapala usa ni natoro waina e mari sasa ki puti navinaga.

⁴Tea maga waina eu doropusi nawotaeana, eu samasamani tea sigisigileo: Ma tea maga waina eu pavaigoro nawotaeana eu marimari dip̃a ra.

⁵Naatam̃oli sa maga eu da midoakiatae navasap̃otaeana mau: Ma tea maga waina eu laaga parati ki Yehovah, eu midoakiatae naleo maga mamau puti.

⁶Tea tika waina e surata naleanaana aneana, E p̃ia liu tea waina e pei sogolapa, ma e mari malauweluki napua aneana maga.

⁷Tea waina e pavaigoro nawotaeana e pei natu manumatua sikai: Ma tea waina e sikoti tea tuatua liu maga, e mari tamana e maliere.

⁸Tea waina e sokari naloriki aneana maga ki narogoviana go nataluaana, E magi tea maritadodomi tea tika, pila daua ki nia.

⁹Tea waina e doa nadaligana naga ega wo da dogo nawotaeana mau, Io, natapasavasaana aneana e pei namamaragokiana.

¹⁰Tea waina e mari tea leana e sasap̃o pano, Ega wo dum̃ana dowo aneana m̃orutano: Ma tea wia lua ega wo peani pioli ki tea wia.

¹¹Tea sogolapa e manumatua aneana namatana; Ma tea tika waina e peani namidoakiataeana, e laaga parati ki nia.

¹²Ragi waina tea leana eu darasa, nasamasamaana warua e doko: Ma ragi waina tea sigisigileo eu duleana, tea laapa eu dum̃ada dasuru ki da.

¹³Tea waina e dap̃augoro natapiriana aneana maga, ega wo da disu p̃ia mau: Ma tea waina e noasai, po doropusi ra, ega wo peani nadodomiana.

¹⁴Tea waina e mataku pitip̃atip̃a, ega wo maro: Ma tea waina e mari nap̃op̃ona e kasua, Ega wo dowo paki namarisakiana.

¹⁵Dakiusi laion waina e do uru, go bear waina e puvua, Tea maramara sigisigileo e dapala nogoe waina e dap̃au naatamoli tika.

¹⁶Tea maraki waina e dika ki namidoakiataeana, nae ma e pei tea riesoki p̃arua: Ma tea waina e karaikita namatam̃aguraana, naaleatia aneana euga wo laapa.

¹⁷Tea waina e mari nada ni te naata e doroa, ega wo sava pano paki m̃oru; Te naata ega ta mauti a mau.

¹⁸Tea waina e surata naleanaana, ega wo pei tea tauluaana: Ma tea waina e mari malauweluki ega wo dowo m̃araverave.

¹⁹Tea waina e do kili natano aneana, ega wo peani p̃arua ki navinaga: Ma tea waina e do dausi tea p̃alo maga ega wo paraki natikaana.

²⁰Tea veilomau ega wo peani p̃arua ki navasap̃iakiana maga: Ma tea waina e mari m̃araverave naga ega vei sogolapa, ega wo da dika mau ki navaratiana;

²¹Naata waina e piragi narae, e da p̃ia mau: Go naata waina e dapiri raki navinaga kiki, e da p̃ia mau.

²²Tea waina e matasoki namatana, e mari m̃araverave naga ega varaki nasogolapaana, Ma e da atae mau naga natikaana ega wo pa parati ki nia.

²³Tea waina e pasa kasua ki naatam̃oli, ega wo edaku pap̃ai Nasaup̃iaana do liu tea waina e pasa m̃om̃oa.

²⁴Naata waina e panako pae tamana kite p̃ilana po naga, E da pei natapiriana mau; Nae e pei ta ni tea marisasaki.

²⁵Tea waina naatana e do garusara, e sike navululuana: Ma tea waina e pavatu Yehovah, ega wo pei tea mariana ega m̃anopunopu.

²⁶Tea waina e dum̃ana pavatu nap̃op̃ona, e pei tea manumatavusa: Ma tea waina e surata ki namanumatuaana, ega wo pei tea tauluaana.

²⁷Tea waina e pitua dua tea tika, ega wo da dika mau: Ma tea waina e dasuru ki namatana, ega wo sua navasasakiana laapa.

²⁸Ragi waina tea sigisigileo eu duleana, tea laapa eu dum̃ada dasuru ki da: Ma ragi waina eu mate puoli, tea leana eu disu po laapa.