Read Nguna Togoa Etafe North NALULUAKIA MAGA 3 Bible Online

NALULUAKIA MAGA 3 - Nguna Togoa Etafe North bible

NALULUAKIA MAGA 3

¹Natugu, p̃a ta malio ki navasapiseikiana aginau mau; Ma nap̃op̃om̃a ega rogo parati ki natip̃akiana aginau maga:

²Nalakena euga wo sokari dua ko navarauana ni naaleatia maga, Go natau maga ni namauriana, go natam̃ateana.

³Nadodomiana go nalomauana eroga ta doropusi ko mau: Pa sara ki da eroga toko nanoam̃a; Pa midiri ra eroga toko tea welewelea ni nap̃op̃om̃a:

⁴Go p̃a wo pap̃ai nasaup̃iaana go namidoakiataeana wia Namata ni Sup̃e go naatam̃oli maga.

⁵Pa vavatu Yehovah ki nap̃op̃om̃a mamau, Go p̃a ta ovi namidoakiataeana anigo mau:

⁶P̃a noasai a doko napua anigo maga mamau puti, Go nae ega wo mari napua anigo maga euga leana.

⁷Pa ta dum̃am̃a midoaki‐go naga kuga manumatua mau; Pa matau ki Yehovah, go p̃a m̃elu dua ki tea sa:

⁸Ega wo pei namaripauriana agi naputom̃a, Go namarae agi navatum̃a maga.

⁹Pa dodomadagani Yehovah ki naloriki anigo maga, Go ki takavea ni nawa ni nakau anigo maga mamau puti:

¹⁰Go nasum̃a ni tea tauakiana anigo maga, Euga wo pura ki nalaapaana, Go m̃oru ni nasua ni nawa ni vaine anigo maga, Euga wo sarasaraape ki waine vau.

¹¹Natugu, p̃a ta midoakip̃alo ki navaratipiseikiana ki Yehovah; Go p̃a ta dodosua navasakasuakiana aneana mau:

¹²Nalakena tea waina Yehovah e dodomi a, E pasa kasua ki nia; Dapala waina piakiki tamana e mari a paki natuna, Waina e dodomi p̃arua ki nia.

¹³Nae e maropa naatam̃oli waina e pap̃ai namanumatuaana, Go naatam̃oli waina e dape namidoakiataeana.

¹⁴Nalakena navakokotoana kakana e p̃ia liu navakokotoana ni silver, Go tea taluaana kakana e p̃ia liu kold wia.

¹⁵E p̃ia liu rubi maga: go te naleo sikai ni tea maga Mamau puti waina ku masau ra e da patakana mau.

¹⁶Navarauana ni naaleatia maga e doko nam̃elearuna ni matua; Nasogolapaana go nadodomadaganiana ero doko nam̃elearuna ni mawiri.

¹⁷Napua aneana maga eu pei napua rogom̃atakiana, Go malo vasiana aneana maga mamau puti eu pei natam̃ateana.

¹⁸E magi tea maga waina eu puasoki a, pei nakau ni namauriana: Go tea waina e dapesoki a, e maro pa.

¹⁹Yehovah e lawo ki maramana ki namanumatuaana; E lawo ki laketoko nakoroatelagi maga ki namidoakiataeana.

²⁰Epua maga eu pei tea tasasaiana ki naataeana aneana, Go napopouru maga eu do lawo ki nasovaki.

²¹Natugu, eroga ta dawasi pa dua ki namatam̃a maga mau; Pa to dapesoki namanumatuaana wia go namidoakip̃otaeana;

²²Go eroga wo magi naatam̃a pei namauriana, Go magi nanoam̃a pei naleom̃atakiana.

²³Ragi wanogoe p̃a wo surata pavatu napua anigo, Go p̃a wo da dapilagona mau.

²⁴Ragi waina ku one natano, p̃a wo da mataku mau: Go p̃a wo one natano po maturu p̃ia.

²⁵P̃a ta matau ki tea mataukiana waina e pakilina m̃araverave mau, Go ki namarisakiana ki tea sigisigileo maga mau, ragi waina e umai:

²⁶Nalakena Yehovah e pei tea waina p̃a vavatu asa, Go ega wo pavaigoro nam̃elem̃a naga ega ta pei tea soliana mau.

²⁷Pa ta mauti tea wia ki talakeana maga mau, Ragi waina e doko nakasuaana ni nam̃elearum̃a naga p̃a mari a.

²⁸Pa ta noa ki tea ni m̃aladigi ki‐go, P̃a vano, po moro umai, Go aga wo dua ko matamai; ragi waina e doko sikoti ko doko.

²⁹Pa ta midoakip̃ai tea sa dip̃a tea ni m̃aladigi ki‐go mau, Waina e doko pavatu sikoti ko.

³⁰Pa ta pululu ki m̃oli ki naatam̃oli sikai mau, Waina e pe ta mari sa ki‐go mau.

³¹Pa ta doitoi naatam̃oli ni namaripavakotoana mau, Go p̃a ta matadoa te napua aneana sikai mau.

³²Nalakena tea mari lolop̃ota e pei tea mamaragokiana ki Yehovah: Ma namidoakip̃otaeana aneana e sikoti tea leana maga.

³³Navasasakiana ki Yehovah e doko nasum̃a ki tea sigisigileo; Ma e do pasap̃ia ki natokoana ki tea leana maga.

³⁴Lomau e do marisaudoa ki tea marisaudoa maga, Ma e do pitua ki nasaup̃iaana paki tea matemate maga.

³⁵Tea manumatua maga euga wo peani nasamasamaana; Ma tea manumatavusa maga eu do dape nadododaoana.