Read Nguna Togoa Etafe North NALULUAKIA MAGA 30 Bible Online

NALULUAKIA MAGA 30 - Nguna Togoa Etafe North bible

NALULUAKIA MAGA 30

¹Navasaana maga ki Akur, natu ni Yakeh, ni Massa. Naatam̃oli wanogoe e noa ki Ithiel, ki Ithiel go Ukal: e naga,

²Lomau a pei naatam̃oli waina e pei lala warua liu naatam̃oli p̃ota maga mamau puti, Go a da peani namidoakiataeana ki naatam̃oli mau:

³Go a da ataedogo namanumatuaana mau, Go a da peani naataeana ki Tea Tapu.

⁴Sei e sake paki nakoroatelagi, go sei e siwo? Sei e pila saisai ki nalagi nam̃elearuna maga? Sei e soli parati ki noai maga ki sugoro aneana? Sei e lawo‐ki‐laketoko namatap̃ago maga mamau puti ni maramana? Nagisana sei, go nagisa ni natuna naanoai e pei sei, Ku pe atae a kite?

⁵Sara navasaana ki Sup̃e eu pei tea maridautaukiana: Nae e magi tea maga waina eu pavatu asa, pei nakokoro.

⁶Pa ta sokari navasaana aneana maga mau, mase e pe vasa kasua ki‐go, Go ku pe vei tea vap̃aiana ku pei tea sorosoro.

⁷A po datagovi ko naleo ero dua; Pa ta mauti ra kiagu ragi waina a ko da mate mau:

⁸Pa malulua ki namarisoreana go nasorosoroana m̃elu dua ki nau pano: Pa ta dua au natikaana mau kite nasogolapaana mau; Pa vagani au ki navinaga waina e p̃ia ki nau:

⁹Mase a pe vuka, po pasagoro ko, po naga, Yehovah e pei sei? Kite mase a pe tika, po panako, po noa m̃oli ki nagisa ni Sup̃e aginau.

¹⁰Pa ta pasapinoa ki tea suasua paki nawota aneana mau, Mase e pe vasa sa ki‐go, go sogi e pe liko ako.

¹¹Tagona sikai e doko waina eu pasa sa ki tamada, Go waina eu da pasap̃ia ki p̃ilada mau.

¹²Tagona sikai e doko waina eu dautau adeada namatada, Ma eu ko da pei tea sarueana mau ki naloaana adeada.

¹³Tagona sikai e doko waina namatada eu leolagi, Go nawili namatada eu pei tea sikeana pakilagi.

¹⁴Tagona sikai e doko waina napatida eu dapala lova, Go napati ni nasida eu dapala masimasi, Naga euga tinomi tea rogokitesa pa dua ki maramana, Go tea tika m̃elu dua ki m̃aleoputo ni naatam̃oli.

¹⁵Asulati marisaki e peani natu nagoroi dua, Ero doko po do pioso, P̃a vitua, p̃a vitua. Naleo tolu eu doko waina eu da pura mau, Io, eu pati waina eu da noa mau, E pataka:

¹⁶Sheol; go nap̃ele dim̃o; natano waina e ko da puka mau ki noai; Go nakapu vavaga waina e ko da noa mau, E pataka.

¹⁷Namata waina e mari saudoa ki tamana, Po midoakipiri naga ega rogo parati ki p̃ilana, Reven maga ni nap̃aloa euga wo pakulua e, Go ikila vusavusa maga euga wo dinomi a.

¹⁸Naleo tolu eu doko, tea ni namagaana waina e p̃arua paki nau, Io, eu pati waina a da atae ra mau:

¹⁹Napua ni ikila doko namalopa; napua ni m̃aata doko vatu; Napua ni shipe doko m̃aleoputo ni natasi; Go napua ni naanoai ki naatara.

²⁰Tea waia e pei napua ni nagoroi maripele; E ganikani, po kasi nagolena, po naga, A da mari te nasigisigileoana mau.

²¹Nalakena naleo tolu navanua e duruuru, Go nalakena eu pati, waina e marisa dape ra mau:

²²Nalakena waina tea suasua e pei nawota; Go waina tea manumatavusa e puka ki navinaga;

²³Nalakena waina nagoroi karaikitaana e laki; Go waina tea suasua nagoroi ega wo peanipioli ki tea ki nawota nagoroi aneana.

²⁴Naleo pati waina eu kiki doko navanua, Ma eu manumatua p̃arua liu:

²⁵Makala eu pei narei waina eu da kasua, Ma eu dum̃ada pea midoaki tea adeada nalo ni navinaga ragi ni sui;

²⁶Koni eu pei tea manainai, Ma eu dum̃ada mari nasum̃a adeada vatu maga;

²⁷Midiri eu da peani nawota mau, Ma eu dave puti pano, eu pei taua go taua;

²⁸Pilikaroa ku mariatae dape a ki nam̃elearum̃a, Ma e doko nasum̃a vakilagi ki nawota maga.

²⁹Naleo tolu eu doko waina eu surata p̃ia, Io, eu pati waina eu surata p̃ia pano:

³⁰Laion, waina e kasua liu nalo tuavati maga, Go e da maradoa pa dua ki te sikai maau mau;

³¹Horse ni navakalo; go naninani anoai; Go nawota, waina e pea ki narei aneana.

³²Waina ku pe mari oli lala po dum̃am̃a sike ko pakilagi, Kite waina ku pe midoaki tea sa, Pa wogoro nawokam̃a ki nam̃elearum̃a.

³³Milk galidoaana e pitua ki batar, go navuasokiana ni nagisu e pitua ki nada: Go dapala nogoe navulevuleana ni namaritausuana e pitua ki navileana.