Read Nguna Togoa Etafe North NALULUAKIA MAGA 31 Bible Online

NALULUAKIA MAGA 31 - Nguna Togoa Etafe North bible

NALULUAKIA MAGA 31

¹Navasaana maga ki Lemuel, nawota ni Massa, Waina p̃ilana e pasapisei ki nia asa.

²Nasava, natugu? Go nasava, natu ni nap̃elegu O? Go nasava, natu ni nasaiana aginau maga?

³Pa ta pitua ki nakasuaana anigo paki nagoroi maga mau, Kite natomariana anigo maga paki tea waina e mari sasa ki nawota maga mau.

⁴E da pei tea ki nawota maga, Lemuel O, E da pei tea ki nawota maga naga euga munu waine; Kite e da pei tea ki tea maraki maga naga euga noa, Namunuana kasua wai?

⁵Mase eu pe munu, po malio ki nawotaeana, Po doa sa ki navasap̃otaeana ki tea rogokitesa.

⁶Tea waina e doko raki namatepuoliana, p̃a tua e namunuana kasua, Go tea waina naatana e dogokitesa, p̃a tua e waine:

⁷Ega munu, po malio ki natikaana aneana, Go ega ta moro midoaki narogokitesaana aneana mau.

⁸Pa magi puusa pasa, raki navasap̃otaeana ki tea laapa Waina eu pei namatapesu maga.

⁹P̃a vasa, p̃a vasap̃otae leana, Go p̃a magi tea rogokitesa go tea tika pasap̃otae.

¹⁰Sei e mariatae pap̃ai nagoroi wia? Nalakena naulu kakana e p̃arua liu rubi maga.

¹¹Nap̃op̃o ni anawota e pavatu asa, Go ega wo da dika ki naleo mau.

¹²E maneana mari tea wia, po da maneana mari tea sa mau, Naaleatia maga mamau puti ni namauriana aneana.

¹³E laaga wool go flaks, Go e suasua p̃osiwosi ki nam̃elearuna.

¹⁴E dakiusi shipe vakokoto; E piragi navinaga aneana pae uvea umai.

¹⁵E duleana ragi waina e ko pei p̃ogi, Po dua tea ni nasum̃a aneana navinaga, Go nagoroi vusavusa aneana nawosiana adeada.

¹⁶E midoakiusiusi vanua sikai, po pakotovi a: Ki nawa ni nam̃elearuna, e lawo roara ni vaine.

¹⁷E dasoki namalona ki nakasuaana, po mari naruna ero kasua.

¹⁸E atae m̃ata ki naga tea vakotoviana aneana e p̃ia: Nasulu aneana e da mate p̃ogi mau.

¹⁹E doropusi nam̃elearuna odaki, go nam̃elearuna ero puati soki tea loasi.

²⁰E p̃elesa ki nam̃elearuna paki tea rogokitesa; Io, e sai ki nam̃elearuna paki tea tika.

²¹E da magi tea ni nasum̃a aneana matauki sno; Nalakena tea ni nasum̃a aneana eu mamau puti pei tea sugoroana ki tea miala.

²²E dum̃ana maneana mari nap̃anu maga ki nakulukulu midimidiria; Sugoro aneana e pei linen wia, go tea miala‐kesakesa.

²³Anawota e pei tea ataeana namata‐pua maga, Ragi waina e dasake sikoti tea matua maga ni navanua.

²⁴E mari sugoro maga ki linen wia, po sori ra; Go e sori tea tasoki paki tea vakokoto.

²⁵Nakasuaana go naveinawotaana ero pei tea suniana aneana; Go e muru ki naaleatia waina ega wo umai.

²⁶E pasa ki namanumatuaana; Go navasapiseikiana ni nadodomiana e doko namenana.

²⁷E leoparati ki m̃ata ki napua maga ki tea ni nasum̃a aneana, Go e da gani navinaga ni namamaleana mau.

²⁸Natuna maga eu duleana, po pasap̃ia ki nia; Go anawota nae ma, go e sorosoro ki nia, po naga:

²⁹Natu nagoroi laapa eu mari tea wia, Ma nigo ku do liu puti ra.

³⁰Wili wia e pei tea vilasurue, go raewia e pei tea p̃alo: Ma nagoroi waina e matauki Yehovah, Nae ega wo pei tea samasamaniana.

³¹Pa tua e tea ni nawa ni nam̃elearuna; Go nawosiana aneana maga euga wo samasamani a doko namata‐pua maga.