Read Nguna Togoa Etafe North NALULUAKIA MAGA 4 Bible Online

NALULUAKIA MAGA 4 - Nguna Togoa Etafe North bible

NALULUAKIA MAGA 4

¹Kuga rogo, natugu maga, natapavanauana ki tamamu, Go kuga takidorogo naga kuga atae namidoakiataeana:

²Nalakena a dua mu naataeana wia; Kuga ta doropusi navasapiseikiana aginau mau.

³Nalakena a pei natu ni tamagu, Tea manainai go sikedau namata ni p̃ilagu.

⁴Go e pasapisei ki nau, po noa ki nau, Nap̃op̃om̃a ega tapesoki navasaana aginau maga; Pa vavaigoro natip̃akiana aginau maga, po mauri:

⁵Pa talua namanumatuaana, p̃a talua namidoakiataeana; Pa ta malio ki nia mau, go p̃a ta dawasi m̃elu dua ki Navasaana maga ni nawokagu mau:

⁶Pa ta doropusi a mau, go ega wo pavaigoro ko; Pa dodomi a, go ega wo leo parati ki‐go.

⁷Namanumatuaana e pei tea vea; Nalakena tea wanogoe p̃a talua namanumatuaana: Go pilake tea taluaana anigo maga mamau puti Pa talua namidoakiataeana.

⁸Pa sike a ega vakilagi, go ega wo puasoki ko: Ega wo mari ko p̃a wo pei tea dodomadaganiana, ragi waina p̃a wo doti a.

⁹Ega wo pitua ki tap̃au sikai ni nasaup̃iaana agi nap̃aum̃a: Ega wo dua ko vauvau sikai ni nasamasamaana.

¹⁰Pa rogo, natugu O, go p̃a tape nanoaana aginau maga; Go natau maga ni namauriana anigo euga wo laapa.

¹¹A po digipisei ki‐go napua ni namanumatuaana; A po maraki ko napua maga ni naleanaana.

¹²Ragi waina ku do surata, navasiana anigo maga euga wo da pei tea riesokiana mau; Go ku pe sava, p̃a wo da dapilagona mau.

¹³Pa tapesoki navasapiseikiana; p̃a ta doropusi a mau: Pa leo parati ki nia; nalakena nae e pei namauriana anigo.

¹⁴Pa ta pae napua ki tea sigisigileo maga mau, Go p̃a ta surata pae napua ki naatam̃oli sa maga mau.

¹⁵Pa karaikita e, p̃a ta liu m̃aladigi ki nia mau; Pa taleledao ki nia, po pano.

¹⁶Nalakena eu pe ta mari naleo sa mau, eu pe ta maturu mau; Go eu pe ta mari te seara eu pe rowo mau, namaturuana adeada e pe vei tea tapeluaana.

¹⁷Nalakena eu do gani navinaga ni nasigisigileoana, Po munu waine ni namaripavakotoana.

¹⁸Ma napua ki tea leana maga e dapala namarama ni aleati, Waina e do maramalaga po maramalaga p̃arua, pa pa paki aleati matua.

¹⁹Napua ki tea sigisigileo maga e dapala namaligo: Eu da atae tea waina eu dapilagona asa mau.

²⁰Natugu, p̃a takidorogo navasaana aginau maga; Pa taki nadaligam̃a paki navasaana aginau maga.

²¹Euga ta dawasi m̃elu dua ki namatam̃a maga mau; Pa to pavaigoro ra m̃aleoputo ni nap̃op̃om̃a.

²²Nalakena nara eu magi tea maga waina eu pap̃ai ra pei namauriana. Go magi nap̃okasida pei namaripauriana.

²³Pa to leo parati ki nap̃op̃om̃a ega warua liu sara navavaigoroana; Nalakena namata ni noai maga ni namauriana eu do dave m̃elu asa.

²⁴Pa mari navasadageleana ega m̃elu dua ki‐go pano, Go navasalolop̃otaana p̃a mari a ega madu uvea ki‐go.

²⁵Namatam̃a maga eroga leo paki kivea, Go nawili ni namatam̃a maga eroga leo leana paki kivea ki‐go.

²⁶Pa mari napua ni nam̃elem̃a ega matemate, Go napua anigo maga mamau puti euga vei tea lawo‐kilaketokoana.

²⁷Pa ta dawasi paki taleva ni matua kite paki taleva ni mawiri mau: Pa mari nam̃elem̃a ega m̃elu dua ki tea sa.