Read Nguna Togoa Etafe North NALULUAKIA MAGA 5 Bible Online

NALULUAKIA MAGA 5 - Nguna Togoa Etafe North bible

NALULUAKIA MAGA 5

¹Natugu, p̃a takidorogo namanumatuaana aginau; Pa taki nadaligam̃a paki namidoakiataeana aginau:

²Naga p̃a vavaigoro namidoakip̃otaeana aginau, Go naga nagolem̃a eroga leo parati ki naataeana.

³Nalakena nagole ni nagoroi p̃ota ero do lawolawo ki honi, Go nawokana e m̃om̃oa p̃arua liu naroro:

⁴Ma ragi edaku kakana e kokona dapala nakokonae, E dapala lova sikai waina e makali taleva dua.

⁵Nam̃elena ero siwo paki namateana; Navasiana aneana maga eu pa soki Sheol;

⁶Naga ega ta pae napua ni namauriana mau: Napua aneana maga eu do duletule go e da atae a mau.

⁷Nalakena tea wanogoe, natugu maga, kuga rogo parati ki nau, Go kuga ta dawasi m̃elu dua ki navasaana maga ni nawokagu mau.

⁸P̃a mari napua anigo ega madu uvea ki nia, Go p̃a ta umai paki m̃aladigi ki namata ni nasum̃a mau:

⁹Ku pe vitua ki nadodomadaganiana anigo paki tea p̃ota maga, Go natau anigo maga paki tea dodotika maga:

¹⁰Tea p̃ota maga eu pe vei tea vakavuroana ki nakasuaana anigo: Go nawosimawosaana anigo maga eu pe toko nasum̃a ki tea ni navanua p̃ota sikai;

¹¹Go p̃a wo susue ragi edaku anigo, Ragi waina nap̃okasim̃a go nap̃atokom̃a eroga wo sirinopu.

¹²Go p̃a wo naga, A pilosi natapavanauana pa, Go nap̃op̃ogu e dip̃adoa navasakasuakiana;

¹³Go a da dogo parati ki nadaleo ni tea maga waina eu pasa pisei ki nau, Go a da daki nadaligagu mau paki tea maga waina eu pasa p̃okati au!

¹⁴A m̃aladigi doko sara nasaana m̃aleoputo ni taua mamau go ni nasaisaiana.

¹⁵Pa munu noai maga m̃elu m̃oru noai anigo, Go noai sara maga m̃elu namata ni noai anigo maga.

¹⁶Namata ni noai anigo maga euga sarasaraape paki etaku, Po pei noaisara maga napua maga ni natokoana kite?

¹⁷Euga vei anigo masikim̃a, Go euga ta pei agi tea p̃ota maga sikoti ko mau.

¹⁸Namata ni noai anigo ega vei tea vasap̃iakiana; Go p̃a laelaea nagoroi ni naveinatureai‐ana anigo.

¹⁹Ega tapala diir goroi dodomiana go kasel goroi leom̃atakiana sikai, Nasusuna eroga mari ko p̃a maro sara ragi; Pa vei tea tapesokiana ki nadodomiana aneana pitip̃atip̃a.

²⁰Go ekasana p̃a vei tea tapepavakotoana, natugu, ki nagoroi p̃ota sikai, Po doti narum̃a ni tea p̃ota sikai?

²¹Nalakena napua maga ki naatam̃oli eu doko kivea ki namata ni Yehovah, Go e do midoakiusiusi napua aneana maga mamau puti.

²²Namarinaleotageleana aneana maga euga wo puasoki tea sigisigileo, Go ega wo pei tea solisokiana ki namea maga ni namarinaleosaana aneana.

²³Nae ega wo mate nalakena natikaana ni navasapiseikiana; Go nalakena nawaruaana ni naveilalaana aneana, ega wo sasap̃o.