Read Nguna Togoa Etafe North NALULUAKIA MAGA 7 Bible Online

NALULUAKIA MAGA 7 - Nguna Togoa Etafe North bible

NALULUAKIA MAGA 7

¹Natugu, p̃a vavaigoro nanoaana aginau maga, Go p̃a taua ki natip̃akiana aginau maga euga sikoti ko.

²Pa vavaigoro natip̃akiana aginau maga po mauri; Go navasapiseikiana aginau ega tapala atolu mata.

³Pa otisoki ra euga toko nakinim̃a maga; Pa midiri ra euga toko tea welewelea ni nap̃op̃om̃a.

⁴P̃a noa ki namanumatuaana, Nigo ku pei goregu; Go p̃a soso namidoakiataeana ki namatarau anigo:

⁵Naga eroga vavaigoro ko pa dua ki nagoroi p̃ota, Pa dua ki nagoroi p̃ota waina e do mari nanoaana aneana maga eu m̃om̃oaa.

⁶Nalakena a doko pisari namata leoduru ni nasum̃a aginau, A leoduru namata leoduru sariana aginau;

⁷Go a leopunusi m̃aleoputo ni tea manumatavusa maga, A leop̃otae m̃aleoputo ni natureai maga, Natureai sikai waina e dika ki namidoakiataeana,

⁸E do liu pae napua ni natokoana m̃aladigi ki naweluki aneana, Go e surata aliali pae napua ni nasum̃a aneana;

⁹Ragi m̃elu, ragi ni namakotokotoana ni aleati, Ragi ni naloaana ni p̃ogi go namaligo.

¹⁰Go kuga leo, nagoroi sikai e sua e Waina e suni sugoro ki tea masausara, go nap̃op̃ona e pei tea tasurukiana.

¹¹Nae e pasap̃arai po pei p̃auluulu; Nam̃elena ero da doko ekopu ni nasum̃a aneana mau:

¹²Te ragi e doko napua maga ni natokoana, Te ragi e doko tokora welewelea kakana maga, Po do kusugoro pisari sara naweluki.

¹³Go e puasoki a, po dum̃ili a, E mari naraena e kasua po noa ki nia, e naga:

¹⁴Naviriana maga ni natam̃ateana eu one au; Masoso a po lagati pitua ki nasaiana aginau maga.

¹⁵Nalakena tea wanogoe a dave umai naga aga sua ko, Naga aga laaga naraem̃a, go a po pap̃ai ko.

¹⁶A po p̃elesa ki nawewele aginau ki nap̃anu maga ni nakulukulu midimidiria, Ki nakulukulu napuapua maga ni nalolu ni Ityipt.

¹⁷A po mari nawewele aginau e nap̃o ki murra, aloe maga, go sinamon.

¹⁸Pa umai, toroga maro ki nadodomiana pa pa paki malip̃ogi; Toroga laelaea ki nadodomiana maga.

¹⁹Nalakena naanoai aginau e da doko nasum̃a aneana mau, E pano pae napua varau:

²⁰E dape nala ni m̃ane doko nam̃elearuna; Ega wo umai paki nasum̃a aneana naaleatia ni atelagi matua.

²¹E pua da ki nia ki nalapalapaana ni navasaana aneana, Ki nam̃om̃oaana ni nagolena maga e piragi lua pavakoto asa.

²²E dausi a pano m̃araverave, Dapala waina oks sikai e pano paki namaripunueana, Go dapala waina tea soliana ki tea moti nem̃elena e pei tea Musagiana paki navaratiana ni tea manumatavusa.

²³Pa pa nalua sikai ega vuri sasama nadanikapuna; Dapala waina manu sikai e mari m̃araverave paki vaivai, Po da atae mau naga nae e doko raki namauriana aneana.

²⁴Go nalakena tea wanogoe, natugu maga, kuga rogo parati ki nau, Po dakidorogo nanoaana maga ni nawokagu.

²⁵Nap̃op̃om̃a ega ta dawasi paki napua aneana maga mau, Pa ta sasap̃o pano pae napua aneana maga mau.

²⁶Nalakena e mari tea laapa eu dowo eu pei tea vuriana: Go tea maripunueana aneana maga mamau puti eu pei taua ni naatam̃oli kasua.

²⁷Nasum̃a aneana e pei napua maga ni Sheol, E do siwo paki em̃ago maga ni namateana.