Read Nguna Togoa Etafe North NALULUAKIA MAGA 8 Bible Online

NALULUAKIA MAGA 8 - Nguna Togoa Etafe North bible

NALULUAKIA MAGA 8

¹Namanumatuaana e da do pioso kite? Go namidoakiataeana e da do pitua ki nadaleona kite?

²E do lawodu nap̃au ni tokora vakilagi maga pisari napua, Tokora waina napua maga eu saisai asa;

³E do pioso kasua nadigi ni namata‐pua maga, pisari nawoka Ni natokoana, tokora ni nasiliana ni namata maga:

⁴A do pioso paki mu, naatam̃oli maga O; Go nadaleogu e paki naatam̃oli natuna maga.

⁵Tea manumatavusa maga O, kuga midoakiatae namarimanumatuana; Go tea veilala maga, kuga vei tea p̃op̃o midoakiatae.

⁶Kuga rogo, nalakena aga wo pasa tea wia lua maga; Go nawolagatiana ni nagolegu maga ega wo pei tea ni tea leana maga.

⁷Nalakena nawokagu ega wo noa nalomauana; Go namarisoreana e pei tea mamaragokiana ki nagolegu maga.

⁸Nanoaana maga mamau puti ni nawokagu eu doko namarinaleoleanaana; Te navatuna tagele kite tea vilokiana e da doko ara mau.

⁹Eu mamau puti doko lina paki tea waina e midoakiatae, Go eu leana paki tea maga waina eu pap̃ai naataeana.

¹⁰Kuga tape navasapiseikiana aginau, Go kuga ta dape silver mau; Go naataeana, p̃arua liu kold matadoaana.

¹¹Nalakena namanumatuaana e p̃ia liu rubi maga; Go naleo maga mamau puti waina eu pei tea masauana eu da patakana mau.

¹²Kinau namanumatuaana, a doko namarimanumatuaana doko, Po do pap̃ai naataeana ni tea midoakip̃otaeana maga.

¹³Namatau‐ki‐Yehovah‐ana e pei navilosiana ni tea sa: A pilosi naleomadagaana, go nap̃op̃ovakilagiana, go napua sa, Go nawoka ni navasasoreana maga.

¹⁴Namidoakip̃otaeana e pei aginau, go namanumatuaana wia: Kinau a pei namidoakiataeana; a peani nakasuaana.

¹⁵Pae au nawota maga eu maramara, go tea maraki maga Eu dawona ki namarinaleoleanaana.

¹⁶Pae au tea maraki maga eu maraki, Go navarapule maga, tea vasap̃otae maga mamau puti ni maramana.

¹⁷Kinau a dodomi tea maga waina eu dodomi au; Go tea maga waina eu m̃arekareka laaga au euga wo pap̃ai au.

¹⁸Nasogolapaana go nadodomadaganiana ero sikoti au; Io, nasogolapaana du, go namarinaleoleanaana.

¹⁹Nawagu e p̃ia liu kold, io, liu kold tautau; Go tea taluaana aginau e p̃ia liu silver matadoaana.

²⁰A do surata napua ni namarinaleoleanaana, Maleoputo ni napua maga ni navasap̃otaeana:

²¹Naga aga mari tea maga waina eu do dodomi au, euga veani naloriki, Naga aga vakavuro nasum̃a ni natauakiana adeada maga.

²²Yehovah e peani au ragi ni naatulakeana ni napua aneana, Pea ki nawosiana aneana maga ni tuai.

²³A pei tea vuvuraikiana pae ragi varau ni tuai, pae ragi ni naatulakeana, Pea ki maramana e doko.

²⁴A pakilina ragi waina epua maga eu da doko mau; Ragi waina namata ni noai maga waina eu pura ki noai, eu da doko mau.

²⁵A pakilina pea ki tava warua maga eu pei tea nadisokiana, Pea ki tava kiki maga:

²⁶Ragi waina e ko da mari natano, go vanua maga mau, Go tea vea ni nam̃otam̃ota ni maramana mau.

²⁷Ragi waina e lawo‐ki‐laketoko nakoroatelagi maga, kinau a doko tokora wanogoe: Ragi waina e dawona ki natalovana doko narae ni epua:

²⁸Ragi waina e lawosoki napopouru maga elagi: Ragi waina namata ni noai maga ni epua eu marimatua:

²⁹Ragi waina e dua natasi kokoi kakana, Naga noai maga euga ta liu natip̃akiana aneana mau: Ragi waina e dawona ki laketano maga ni maramana:

³⁰Ragi wanogoe a doko pisari a, dapala mataisau matua sikai: Go a pei namaroana aneana sara naaleatia, Doko do laelaea naraena sara ragi;

³¹Doko do laelaea maramana aneana waina e magi naatam̃oli dawona ki nia; Go namaroana aginau e sikoti naatam̃oli natuna maga.

³²Go nalakena tea wanogoe, natugu maga, kuga rogo parati ki nau: Nalakena tea maga waina eu pavaigoro napua aginau maga eu maropa.

³³Kuga rogo navasapiseikiana, go kuga manumatua, Go kuga ta karaikita e mau.

³⁴E maropa naatam̃oli waina e do dogo parati ki nau, Doko do leogoro pisari namata‐pua aginau maga sara naaleatia, Doko do pavaigoro pisari nakautu maga ni namata aginau maga.

³⁵Nalakena tea waina e pap̃ai au e pap̃ai namauriana, Go ega wo dape nasaup̃iaana m̃elu Yehovah.

³⁶Ma tea waina e pa dua ki nau e dum̃ana mari sa ki naatana; Tea maga mamau puti waina eu pilosi au eu dodomi namateana.