Read Nguna Togoa Etafe North TEA TAPAVANAU 1 Bible Online

TEA TAPAVANAU 1 - Nguna Togoa Etafe North bible

TEA TAPAVANAU 1

¹Navasaana maga ki Tea Tapavanau, natu ni David, nawota ni Yerusalem.

²Nap̃aloana ni nap̃aloana maga, Tea Tapavanau e noa e; nap̃aloana ni nap̃aloana maga, e pei nap̃aloana mau.

³Naatam̃oli e pei tea silaeana nasava ki nawosiana mamau aneana, waina e do p̃osiwosi mawosa asa doko etano ni elo?

⁴Tagona sikai e do pano, go tagona p̃ota sikai e do moro pakilina; ma maramana e doko po doko mau doko.

⁵Elo e do sake, go elo e do musu, po do mari m̃araverave paki tokora aneana waina e do sake asa.

⁶Nalagi e do pano paki sauth, po moro maradoa paki north: e do maradoa pitip̃atip̃a napua aneana, go nalagi e do moro liliu paki nataliviriana aneana maga.

⁷Noaisara maga mamau puti eu do sara paki natasi pano, ma natasi e da pura mau; tokora waina noaisara maga eu do sara paki asa, tokora wanogoe eu moro do sara paki asa pano.

⁸Naleo maga mamau puti eu pura ki namawosaana; naatam̃oli e mari sa noa atae puti a mau: namatana e da maro ki naleopunusiana mau, go nadaligana e da pura ki narogoana mau.

⁹Tea waina e doko tuai e pei tea waina ega wo moro doko; go tea waina e pei tea mari‐sua‐ana, e pei tea waina ega wo moro pei tea mariana: go te naleo vau sikai e da doko etano ni elo doko mau.

¹⁰Te navatuna sikai e doko waina eu do pasa asa po naga, P̃a leo, tea waia e pau, kite? E doko sua doko, e doko ragi ni tuai, ragi ni natau maga waina eu pea ki gida.

¹¹Namidoakilagati‐ana ni tagona vea maga e dika; go namidoaki‐lagati‐ana ni tagona edaku maga waina euga wo edakugoro gida, ega wo moro dika.

¹²Kinau, Tea Tapavanau, a pea pei nawota Yerusalem dap̃au Israel.

¹³Go a pitua ki nap̃op̃ogu paki namanumatuaana naga aga midoaki laaga po leousiusi tea mamau puti waina eu do pei tea mariana doko etano ni nakoroatelagi: e pei narogokitesaana warua waina Sup̃e e dua naatam̃oli natuda maga asa, naga euga maridogo wosiwosi asa.

¹⁴A punusi sua sara natomariana maga mamau puti waina eu do pei tea mariana doko etano ni elo; go kuga leo, eu mamau pei tea p̃alo, go e pei nakasuaana m̃oli ni nalagi.

¹⁵Tea waina e dagele e mari sap̃o pei tea mariana ega leana mau: go tea waina e puoli e mari sap̃o pei tea veveana mau.

¹⁶A dum̃agu pasa nap̃op̃ogu, a naga, P̃a leo, a pei tea manumatua p̃arua liu tea maga mamau puti waina eu doko pea kinau doko Yerusalem: io, nap̃op̃ogu e atae p̃arua ki namanumatuaana go ki naataeana.

¹⁷Go a pitua ki nap̃op̃ogu e kasua doko asa doko, naga aga atae namanumatuaana, go naga aga atae p̃otae naroropaana go namanumatavusaana: a punusi naga tea wanogoe e moro pei nakasuaana m̃oli ni nalagi.

¹⁸Nalakena namanumatuaana e pe warua, nariesokiana ma e pe warua; go naata waina e do disu po p̃arua ki naataeana, e do moro po p̃arua ki narogokitesaana.