Read Nguna Togoa Etafe North TEA TAPAVANAU 10 Bible Online

TEA TAPAVANAU 10 - Nguna Togoa Etafe North bible

TEA TAPAVANAU 10

¹Lago maga ni namateana eu mari naroro lolo ki tea mari naroro lolo e nap̃o sa: go pataka sikai naveilalaana kiki sikai e madaga liu namanumatuaana go nadodomadaganiana.

²Nap̃op̃o ni naatam̃oli manumatua e kerea ki nia paki taleva ni matua; ma nap̃op̃o ni tea manumatavusa e kerea ki nia paki taleva ni mawiri.

³Io, ragi waina tea manumatavusa e do surata napua, e dika namidoakiatae‐ana, go e noa ki sara naata naga nae e pei tea manumatavusa sikai.

⁴Namaetoana ki tea maramara e pe vavaga dip̃a ko, p̃a ta m̃elu dua ki tokora anigo pano mau; nalakena navei‐p̃op̃o‐wia‐ana e do mari lua narogokitesaana warua maga.

⁵Navatuna sa sikai e doko waina a punusi a etano ni elo, dapala nasasap̃oana sikai waina e dave m̃elu tea maramara umai:

⁶Tea vei lala e pei tea lawokiana doko tokora vakilagi warua, go tea vei sogolapa maga eu dasake doko tokora vakitano.

⁷A punusi naviti maga eu sakesaake horse maga, go tea maraki maga eu surata dakiusi tea suasua maga.

⁸Tea waina e kili m̃orutano sikai ega wo dowo paki asa; go tea waina e mari p̃orae nakoro, m̃aata sikai ega wo kati a.

⁹Tea waina e dae vatu maga, ega wo pei tea marisakiana asa; go tea waina e masi p̃orae nakau, e pe wo peani narogokitesaana pae asa.

¹⁰Airon e pe p̃olu, go te naata e pe ta pakali namenana mau, e one asa one naga ega wo doropusi nakasuaana warua paki asa: ma namanumatuaana e do silae narisup̃ia‐ana.

¹¹M̃aata e pe vivikati pea ki waina e pei tea vasa‐dalakolakokiana, tea waina e pasa dalakolako e pe vei tea m̃oli.

¹²Navasaana maga ni nawoka ni naatam̃oli manumatua sikai eu saup̃ia; ma nagole ni tea manumatavusa sikai eroga wo dinomi a.

¹³Naatulakeana ni navasaana maga ni nawokana e pei naveilalaana: go nanopuana ni nanoaana aneana e pei naroropaana sa.

¹⁴Tea veilala sikai e do pasa navasaana laapa: ma naatam̃oli e da atae tea waina ega wo pakilina mau; go tea waina ega wo edakugoro e, sei waina e mariatae noa ki nia asa?

¹⁵Nawosiana ki tea veilala maga e mari ra eu mawosa puti, nalakena eu da atae napua paki natokoana mau.

¹⁶Ai ki‐go, navanua O, ragi waina nawota anigo e ko pei piakiki sikai, go tea maraki anigo maga eu do ganikani malip̃ogi!

¹⁷Ku maro pa p̃ia, navanua O, ragi waina nawota anigo e pei natu ni tea vakilagi maga, go tea maraki anigo maga eu ganikani ragi kakana, raki nakasuaana, go e da pei raki namatamalokuana mau!

¹⁸Nasu e lop̃o nalakena namamaleana; go nasum̃a e do duturu nalakena nam̃elearu doko m̃oli doko.

¹⁹Nakaniana e do mari namuruana, go waine e do mari namauriana e laelaea: go m̃ane e pei tea suasua wia.

²⁰P̃a ta pasa sa ki nawota mau, p̃a ta pasa sa ki nia namidodoana anigo mau; go p̃a ta pasa sa ki tea vei sogolapa doko ekopu ni em̃ago ni namaturuana anigo mau: nalakena manu sikai ni namalopa ega wo dape nadaleom̃a pano, go tea waina e pilake nalivaru ega wo noasai tea wanogoe.