Read Nguna Togoa Etafe North TEA TAPAVANAU 11 Bible Online

TEA TAPAVANAU 11 - Nguna Togoa Etafe North bible

TEA TAPAVANAU 11

¹P̃a nadi ki navinaga anigo elagi ni noai maga: nalakena p̃a wo moro pap̃ai a edaku ki naaleatia laapa.

²P̃a tap̃otawotae matele sikai ega larua asa, kite ega latolu; nalakena ku da atae seve nasaana waina ega wo pakilina maramana mau.

³Napopouru maga eu pe vura ki usa, eu pe tum̃ada ligi paki natano: go nakau sikai e pe rowo paki taleva ni sauth, kite paki taleva ni north, tokora waina nakau wanogoe e pe rowo asa, tokora wanogoe e pe wo one asa one.

⁴Tea waina e pavaigoro nalagi, ega wo da sapura ki mau; go tea waina e midoaki napopouru maga, ega wo da dagaukotovi mau.

⁵Dapala waina ku da atae takana waina nalagi e do sau, kite takana waina natawotu maga eu do lavulavu nap̃ele ni nagoroi waina e pivilake doko; dapala nogoe ku da atae nawosiana ki Sup̃e waina e mari tea mamau puti.

⁶Malip̃ogi p̃a sapura ki napati anigo, go ragi melu p̃a ta mauti nam̃elearum̃a mau: nalakena ku da atae tea waina ega wo pisou mau, e pe vei tea waia, kite tea wanana, mase ero pe rua p̃ia pataka sikai.

⁷Lomau namarama e p̃ia, go e pei tea masauniana naga namata ni naatam̃oli euga leo punusi elo.

⁸Naatam̃oli sikai e pe mauri doko natau eu pe laapa, po peani nalaelaeaana ara; ma ega midoaki parati ki naaleatia maga ni namaligo, nalakena nara euga wo laapa. Tea maga mamau puti waina eu pakilina, eu pei tea p̃alo.

⁹P̃a laelaea, natureai O, doko naveinatureai‐ana anigo; go nap̃op̃om̃a ega mari ko p̃a marasike naaleatia maga ni navei‐natureai‐ana anigo, go p̃a surata napua maga ni nap̃op̃om̃a, go ni naleosaiana ni namatam̃a maga: ma p̃a atae naga nalo ni naleo maga mamau puti wanogoe, Sup̃e ega wo piragi ko paki navasap̃otaeana asa.

¹⁰Nalakena tea wanogoe p̃a mari narogokitesaana ega m̃elu dua ki nap̃op̃om̃a, po doropusi tea sa ega toko uvea ki nap̃atokom̃a: nalakena navei‐natureaiana go nakasuaana ero pei tea p̃alo.