Read Nguna Togoa Etafe North TEA TAPAVANAU 12 Bible Online

TEA TAPAVANAU 12 - Nguna Togoa Etafe North bible

TEA TAPAVANAU 12

¹Go p̃a midoa ki parati ki Tea Tawona ki‐go naaleatia maga ni navei‐natureai‐ana anigo, ega vea ki naaleatia sa maga waina euga wo umai, go natau maga waina euga wo disu paki m̃aladigi, ragi waina p̃a wo naga, A da midoa ki m̃ata ki da mau.

²Kite ega vea ki ragi waina elo, go namarama, go atelagi, go m̃asoe maga euga wo maligoligo, go napopouru maga euga wo liliu edaku ki usa:

³Naaleatia waina tea vavaigoro maga ni nasum̃a euga wo duruuru, go naatam̃oli kasua maga euga wo kolokolo, go tea mani maga euga wo makoto nalakena eu po pisa maau, go tea maga waina eu do leoduru namata leoduru maga euga wo maligoligo.

⁴Go namata‐pua maga paki napua euga wo pei tea kokoroana; ragi waina nadaleo ni namaniana ega wo pakitano, go sikai ega wo dakiusi nadaleo ni manu sikai, go nadaleo ni nagoroi lega maga euga wo pakitano;

⁵Ioro, euga wo matau ki tokora vakilagi, go tea ni namatakuana maga euga wo doko napua; go nakau amond ega wo pum̃a, go midiri ega wo sukasuka liliu, go namasauana ega wo nopu: nalakena naatam̃oli ega wo paki tokora ni namaromaroana aneana waina e du mau du, go tea tagi maga euga wo surata pae napua maga:

⁶Kite ega vea ki ragi waina namori ni silver ega wo maruarua, kite lasa ni kold ega wo pei tea mari‐p̃oraeana, kite lasa vautu ega wo maworawora pisari namata noai, kite tea taliepu ega wo makoto pisari luku noai;

⁷Go nam̃otam̃ota ega wo liliu paki natano dapala waina e doko sala vea, go naatana ega wo liliu pa punusi Sup̃e waina e pitua ki nia.

⁸Nap̃aloana ni nap̃aloana maga, Tea Tapavanau e noa e; e pei nap̃aloana mau.

⁹Go nalakena Tea Tapavanua e manumatua, e moro do pasa pisei ki narei ki naataeana; go e midoakiusiusi, po laaga parati ki, po atusi m̃ata ki naluluakia laapa.

¹⁰Tea Tapavanua e laaga parati ki naga ega vap̃ai navasaana midoaki‐m̃atakiana, go tea waina e pei tea midiri‐leana‐kiana, e pei navasaana maga ni nalomauana.

¹¹Navasaana maga ki tea manumatua eu dakiusi nakau tip̃atip̃a maga, go navasa‐maluluakiana maga waina tea leoparatiki sikai maau e pitua ki nia, eu dakiusi tea turituri maga waina eu pei tea turi‐soki‐kasuakiana.

¹²Go koto, p̃a vei tea vasaparati‐kiana: namari‐tusi‐ana maga ega wo da nopu mau; go namarim̃arekarekaana warua e pei namawosaana ni nap̃okasi.

¹³Tea waia e pei navasaana malaapa nalo ni naleo wanogoe; go e nopu: p̃a matau ki Sup̃e, po pavaigoro natip̃akiana aneana maga; nalakena tea waia e pei tea mamau waina e one naatam̃oli one naga ega mari a.

¹⁴Nalakena Sup̃e ega wo piragi sara nawosiana paki navasap̃otaeana ega vilake sara navatuna waina eu sili doko, e pe vei tea wia kite e pe vei tea sa.