Read Nguna Togoa Etafe North TEA TAPAVANAU 2 Bible Online

TEA TAPAVANAU 2 - Nguna Togoa Etafe North bible

TEA TAPAVANAU 2

¹A noa ki nap̃op̃ogu, a naga, Ita, aga wo maridogo ko ki nalaelaeaana; nalakena tea wanogoe p̃a maro tea masauniana maga: go kuga leo, tea wanogoe e moro pei tea p̃alo.

²Nalo ni namuruana, a naga, E pei naroropaana: go nalo ni nalaelaeaana, E do mari nasava?

³A midoakiusiusi nap̃op̃ogu takana waina aga mari nap̃okasigu ega rogokitep̃ia ki waine, nap̃op̃ogu ega mari manumatua asa, go takana waina aga vuasoki naveilalaana, pa pa aga vunusi tea waina ega vei tea wia raki naatam̃oli natuda maga naga euga mari a doko etano ni nakoroatelagi sara naaleatia ni namauriana adeada.

⁴A maginau mari nawosiana warua maga; a maginau davagi nasum̃a maga; a maginau lawo roara ni vaine maga;

⁵A maginau mari roara maga, go mala ni nakau maga, go a lawo nakau maga ara, waina eu dau ki nawada visarasara maga:

⁶A maginau mari luku ni noai maga, naga aga vue nakau maga waina a lawo ra mala ni nakau:

⁷A pakatovi tea suasua naanoai maga go nagoroi maga, go a pei talakea ni tea suasua maga waina eu pakilina nasum̃a aginau; go a pei talakea ni navata warua maga ni katel go ni shiip, p̃arua do liu tea maga mamau puti waina eu doko pea kinau doko Yerusalem:

⁸Go a maginau pila daua ki silver go kold, go tea tauakiana ni naleo wia masauniana ki nawota maga go ki namarakiana maga: a peani tea lega naanoai maga go tea lega nagoroi maga, go narup̃a laapa tea ni namaroana ki naatam̃oli natuda maga.

⁹Go dapala nogoe a pei tea vakilagi sikai, go a disu po p̃arua do liu tea maga mamau puti waina eu doko pea kinau doko Yerusalem: go namanumatuaana aginau e doko po doko au doko.

¹⁰Go tea waina namatagu maga ero masauna, a da mauti ra asa mau: a da mauti nap̃op̃ogu pa dua ki nalaelaeaana mau, nalakena nap̃op̃ogu e pap̃ai nalaelaeaana doko nawosiana mamau puti aginau; go tea wanogoe e pei matele aginau, tea ni nawosimawosa‐ana mamau puti aginau.

¹¹Go a leousiusi nawosiana maga mamau puti waina nam̃elearugu maga ero mari sua e, go nawosiana waina a p̃osiwosi mawosa asa po mari sua e: go p̃a leo, e pei tea p̃alo mau, go e pei nakasuaana m̃oli ni nalagi, go te nataluaana e da doko etano ni elo doko mau.

¹²Go a maradoa naga aga leo punusi namanumatuaana, go naroropaana, go naveilalaana: nalakena naatam̃oli waina ega wo edakugoro nawota e mariatae mari nasava, ma tea waina e pea pei tea mari‐sua‐ana ega sikina?

¹³Go a punusi naga namanumatuaana e p̃ia liu namanumatavusaana, e dapala waina namarama e p̃ia liu namaligo.

¹⁴Namata ni naatam̃oli manumatua ero doko nap̃auna, go tea vei lala e do surata namaligo: ma a leo atae naga navatuna sikai maau e do pakilina ki puti ra.

¹⁵Go a noa nap̃op̃ogu, a naga, Dapala waina e do pakilina ki tea vei lala, dapala nogoe ega wo moro do pakilina kinau; go ekasava a pei tea manumatua liu? Go a noa nap̃op̃ogu naga tea wanogoe nae ma e moro pei tea p̃alo.

¹⁶Nalakena naatam̃oli manumatua ega wo dakiusi tea manumatavusa, ega wo da moro pei tea midoakiana mau; doko naaleatia maga waina euga wo umai, tea mamau puti euga wo pei tea maliokiana sua. Naatam̃oli manumatua ega wo mate dapala tea vei lala!

¹⁷Nalakena tea wanogoe a pilosi namauriana; nalakena nawosiana waina e do pei tea mariana doko etano ni elo e sa kinau: nalakena e mamau pei tea p̃alo go e pei nakasuaana m̃oli ni nalagi.

¹⁸Go a pilosi nawosiana mamau puti aginau waina a p̃osiwosi mawosa asa doko etano ni elo: nalakena e one au one naga aga toropusi a ega toko raki naatam̃oli waina ega wo edakugoro au.

¹⁹Go sei e atae mase e pe wo pei naatam̃oli manumatua sikai kite tea vei lala? Ma ega wo maramara dap̃au nawosiana mamau puti aginau waina a p̃osiwosi asa, go waina a mari a ki namanumatuaana aginau doko etano ni elo. Tea wanogoe e moro pei tea p̃alo.

²⁰Nalakena tea wanogoe a maradoa po mari nap̃op̃ogu e pelepele nalo ni nawosiana mamau puti waina a p̃osiwosi mawosa asa doko etano ni elo.

²¹Nalakena naatam̃oli waina e do p̃osiwosi mawosa ki namanumatuaana, go ki naataeana, go ki naatae‐m̃ata‐kiana, ega toropusi a ega toko pei matele ki naatam̃oli waina e da do p̃osiwosi asa mau. Tea wanogoe nae ma e moro pei tea p̃alo go e pei tea sa warua liu.

²²Go naatam̃oli ega veani tea wia nasava mawosi‐mawosa‐ana mamau aneana, go namari‐kasua‐ana ni nap̃op̃ona, waina e p̃osiwosi mawosa asa etano ni elo?

²³Nalakena naaleatia aneana maga eu pura ki narogokitesaana maga, go nawosiana kasua aneana e pei nariesokiana mau; ioro, nap̃op̃ona e da do maromaro p̃ogi mau. Tea wanogoe nae ma e moro pei tea p̃alo.

²⁴Te navatuna e da doko mau waina e p̃ia ki naatam̃oli liu naga ega kanikani, po munu, po mari naatana ega maro nawosiana aneana. Go a punusi naga naleo wanogoe e moro pae nam̃elearu ni Sup̃e umai.

²⁵E pe ta dapala nogoe mau, sei e pe mariatae ganikani, kite sei e pe mariatae peani nalaelaeaana?

²⁶Nalakena naatam̃oli waina ega vap̃ai nasaup̃iaana namatana, Sup̃e ega tua e namanumatuaana, go naataeana, go nalaelaeaana: ma ega tua tea mari naleo sa nawosiana kasua, naga ega to pilae saisai po do daua ki, naga ega vitua ki nia paki naatam̃oli waina ega vap̃ai nasaup̃iaana namata ni Sup̃e. Tea wanogoe nae ma e moro pei tea p̃alo, go e pei nakasuaana m̃oli ni nalagi.